Búgin Úkimet úıinde Energetıka vıse-mınıstri Maǵzum Myrzaǵalıevtiń qatysýymen Prezıdenttiń «Eldi gazben qamtamasyz etýdi jalǵastyrý» besinshi bastamasyn iske asyrýǵa arnalǵan baspasóz konferensııasy ótti.
Maǵzum Myrzaǵalıevtiń aıtýynsha, 2014 jyly Úkimet Qazaqstandy 2015–2030 jyldarǵa deıin gazdandyrýdyń bas shemasyn bekitti. Osy shemaǵa sáıkes gazdandyrý deńgeıin aǵymdaǵy 47%-ten 2030 jylǵa qaraı 56%-ke deıin jetkizý kózdelip otyr. Bul 3 mln adamdy nemese 1,6 myńnan astam eldi mekendi gazben qamtamasyz etýge múmkindik beredi.
«Gaz tasymaldaý ınfraqurylymyn damytýdyń elimizdiń energetıkalyq qaýipsizdigin qamtamasyz etýde jáne respýblıka ekonomıkasy úshin strategııalyq máni asa zor. Sondaı-aq, bul el halqynyń ekologııalyq jáne áleýmettik ál-aýqatyn jaqsartýǵa jol ashady», — dedi vıse-mınıstr.
Spıkerdiń bergen málimetine sáıkes, táýelsizdik jyldary gazdy ishki tutyný 1,5 esege ósken (1991 jyly 9 mlrd m3-tan 2017 jyly 13,8 mlrd m3-qa deıin). Kommýnaldyq jáne turmystyq kásiporyndar men halyqtyń gazdy tutyný kóleminiń ósýi QR gazdandyrýdyń bas shemasynda qarastyrylǵan sharalar keshenin júzege asyrýmen baılanysty.
«Qyzylorda — Jezqazǵan — Qaraǵandy — Temirtaý — Astana — Kókshetaý — Petropavl» baǵyty boıynsha «Saryarqa» magıstraldi gaz qubyry jobasyna «QazTransGaz» AQ tehnıkalyq–ekonomıkalyq negizdeme ázirlegen bolatyn. Oǵan «Memsaraptama» RMK oń baǵasyn berdi. TEN-ge sáıkes jobanyń jalpy quny — 370 mlrd teńgeni (QQS-men) quraıdy. Jobany kezeń-kezeńimen iske asyrý kózdelgen.
M. Myrzaǵalıevtiń aıtýynsha, búginde Memleket basshysynyń tapsyrmasyna sáıkes uzyndyǵy 1081 shaqyrym, quny 267 mlrd teńge bolatyn «Qyzylorda — Jezqazǵan — Qaraǵandy — Astana» baǵyty boıynsha birinshi kezeń ázirlenip jatyr. Gaz qubyrynyń osy ýchaskesi Astana, Qaraǵandy, Temirtaý, Jezqazǵan qalalarynyń turǵyndaryn jáne magıstraldi gaz qubyry trassasy boıyna jaqyn ornalasqan eldi mekenderdi tabıǵı gazben qamtamasyz etetin bolady.
«Saryarqa» jobasyn iske asyrý Astanada aýaǵa tastalatyn zııandy qaldyqtardy jylyna 36,1 myń tonnaǵa deıin azaıtýǵa múmkindik beredi. «Saryarqa» magıstraldi gaz qubyrynyń qurylysy barysynda shamamen 800 jumys orny jáne ony paıdalaný kezeńinde 225 jumys orny ashylady dep kózdelip otyr.
Sonymen qatar, Qaraǵandy, Aqmola oblystary jáne Astana qalasy ákimdikteri gaz taratý jelilerin jobalaý men salý máselelerin pysyqtap jatyr. Osylaısha taratý jelileriniń birinshi kezeńi gaz qubyrynyń qurylysy aıaqtalysymen 2019 jyldyń jeltoqsanynda qosylýǵa daıyn bolýy tıis.
Eske sala keteıik, bıyl 5 naýryzda Elbasy Qazaqstan halqyna arnaǵan Úndeýinde bir jarym jyl ishinde, ıaǵnı 2019 jyldyń jeltoqsan aıyna deıin Astanany, Qazaqstannyń ortalyq jáne soltústik óńirlerin gazben qamtamasyz etý maqsatynda «Qyzylorda — Jezqazǵan — Qaraǵandy — Temirtaý — Astana» baǵyty boıynsha «Saryarqa» magıstraldi gaz qubyrynyń qurylysy jobasyn júzege asyrýdy tapsyrdy.