Ulttyq Ulan qyzmetinde esirtki izdeý jumysyna ıisshil ıtterdi paıdalaný óz tıimdiligin kórsetip keledi. О́tken jyly qyzmet barysynda esirtki tabýdyń 56 oqıǵasy tirkelip, 103 keli túrli esirtki zattary tárkilengen. Bul nátıjeler kınolog mamandardyń biliktiligine tikeleı baılanysty.
Osy rette, Almaty mańynda ornalasqan Ulttyq ulannyń 6654 áskerı bóliminde ótken kınologtardyń biliktiligin arttyrýǵa arnalǵan 4 aptalyq halyqaralyq semınar-trenıng sheberlik shyńdaýdyń ozyq alańyna aınaldy desek bolady.
Qaýipsizdik maqsatyndaǵy san túrli sharada qyzmetkerlerge qolǵabys bolatyn qyraǵy ıtterdi baýlýda Amerıkandyqtardyń aldyna túsip kórgen el joq. Tájirıbe turǵysynan da ózgelerden daralanatyn osy eldiń kınologtary. Elimizge dál osy AQSh-tan arnaıy kelgen ozyq mamandar, Esirtkige qarsy kúres baǵdarlamasynyń menedjeri Krıstofer Kent jáne kınolog-nusqaýshy Brıýs Gýdleı men Skott Zaıtner tórt apta boıy Ulan sarbazdaryn bul istiń qyr-syryna qanyqtyryp, óz tájirıbelerimen bólisti. Oqý-jattyǵý aıasynda esirtki zattaryn izdep tabý maqsatynda paıdalanylatyn ıisshil ıetterdi baptaý men olardyń daǵdysyn arttyrý boıynsha sheteldik mamandardyń tyń tájirıbesi Ulan sapyndaǵy kınologtardyń biliktiligin shyńdaı tústi.
Halyqaralyq sheńberde uıymdastyrylǵan semınardyń jabylý saltanatyna kelgen AQSh-tyń Almaty qalasyndaǵy bas konsýly Mark Mýdı atalǵan shara eki el arasyndaǵy yntymaqtastyq pen áskerı tájirıbe almasýǵa zor serpin bergenin aıtyp, aldaǵy ýaqytta da bul baǵyttaǵy jumystar jalǵasyn tabatynyn málimdedi.
Ulttyq ulan kınologtary áskerı bólimdegi Kınologııalyq ortalyqta ótken trenıng barysynda AQSh-tyń tájirıbeli mamandarynan zańsyz taýar aınalymyna qarsy kúres júrgizýge qatysty ádis-tásilderdi úırenip, aıazdy kúnder men 40 gradýstyq ystyq aýa raıynda qyraǵy ıttermen qalaı jumys isteý kerektigin aıtyp, óz tájirıbelerin de ortaǵa saldy. Bas-aıaǵy bir aıǵa sozylǵan halyqaralyq oqý-jattyǵý nátıjesi boıynsha ulandyq kınologtar oqý kýrsynan ótip, biliktiligin arttyrǵanyn rastaıtyn sertıfıkat alý úshin qorytyndy emtıhan tapsyrǵan bolatyn. Nátıjesinde, talapkerlerdiń bári derlik senim údesinen shyǵa bildi.
– Tájirıbe sabaqtary oıdaǵydaı ótti. Sheteldik mamandardan ıisshil ıtterdi baptaýdyń tyń tásilderin úırendik. Endi osyny jumys barysynda qoldanýǵa múmkindik alyp otyrmyz, – deıdi tálimger-kınolog Aıdos Rahmetov.
Is-sharanyń saltanatty jabylý rásiminde jattyǵý jıynynan ótken sarbazdar esirtki zattaryn izdeý jáne shartty qylmyskerlerdi quryqtaý boıynsha esirtki izdeıtin ıttermen kórsetilimdik sabaqtar uıymdastyryp jınalǵandarǵa óz ónerlerin pash etti.
Arman OKTIаBR, «Egemen Qazaqstan»