Rýdnyı qalasynda úsh jyldan beri qurylysy sozylyp kele jatqan sement zaýyty bıyl paıdalanýǵa beriletin boldy. Zaýyt qurylysynyń barysyn jaqynda oblys ákimi Arhımed Muhambetov kózimen kórip qaıtty. Qazir zaýyt qurylysy aıaqtalýdyń aldynda tur.
«Maýsym aıynda aınalmaly kúıdirý peshin jaǵamyz, shilde aıynda shıkizat tasýǵa arnalǵan temir jol tuıyǵy daıyn bolady» dedi Rýdnyı sement zaýytynyń dırektory Artem Maksalov.
Peshti jaǵyp kórý úshin shıkizat aldyn ala avtookóliktermen tasylǵan. Peshti jaǵý tehnologııasy Belgorod tehnıkalyq memlekettik ýnıversıtetiniń ókilderimen birlesip synaqtan ótken. Zaýyt dırektorynyń aıtýynsha, munda 400-shi markaly sýlfatturaqty sement óndireletin bolady. Sonymen qatar 500-shi markaly sement te shyǵarylady. Otandyq shıkizat sementtiń bes markasyn shyǵarýǵa múmkindik beredi.
Bıylǵy jazdyń ortasynda ónimin bere bastaıtyn zaýyt sementtiń baǵasyn ımporttyq balamalardan áldeqaıda arzan usynatyn bolady.
Názıra Járimbet
«Egemen Qazaqstan»
Rýdnyı