Jańa magıstraldy gaz qubyry úsh mıllıon qazaqstandyqty gazben qamtamasyz etýge jol ashady. Bul týraly Úkimettiń baspasóz ortalyǵynda ótken brıfıngte Energfetıka vıse-mınıstri Maǵzum Myrzaǵalıev málimdedi.
Baspasóz jıynynda Energetıka vıse-mınıstri Prezıdenttiń «eldi gazben qamtamasyz etýdi jalǵastyrý» dep atalatyn besinshi bastamasyn iske asyrý baǵytyndaǵy jumystar jaıyn baıandady. Elbasy Qazaqstan halqyna arnaǵan Úndeýinde bir jarym jyl ishinde, ıaǵnı 2019 jyldyń jeltoqsan aıyna deıin Astanany, Qazaqstannyń ortalyq jáne soltústik óńirlerin gazben qamtamasyz etý maqsatynda «Qyzylorda – Jezqazǵan – Qaraǵandy – Temirtaý – Astana» baǵyty boıynsha «Saryarqa» magıstraldy gaz qubyrynyń qurylysy jobasyn júzege asyrýdy tapsyrǵan bolatyn.
Málim bolǵandaı, «Saryarqa» magıstraldy gaz qubyry jobasyna «QazTransGaz» AQ tehnıkalyq-ekonomıkalyq negizdeme ázirlegen. Oǵan «Memsaraptama» RMK oń baǵasyn berdi, deıdi mamandar. Jobanyń jalpy quny 370 mlrd teńgeni (QQS-men) quraıdy. Jobany kezeń-kezeńimen iske asyrý kózdelgen.
M.Myrzaǵalıevtiń aıtýynsha, búginde Memleket basshysynyń tapsyrmasyna sáıkes uzyndyǵy 1081 shaqyrym, quny 267 mlrd teńge bolatyn «Qyzylorda – Jezqazǵan – Qaraǵandy – Astana» baǵyty boıynsha birinshi kezeń ázirlenip jatyr. Gaz qubyrynyń osy ýchaskesi Astana, Qaraǵandy, Temirtaý, Jezqazǵan qalalarynyń turǵyndaryn jáne magıstraldy gaz qubyry trassasy boıyna jaqyn ornalasqan eldi mekenderdi tabıǵı gazben qamtamasyz etetin bolady.
«Saryarqa» jobasyn iske asyrý Astanada aýaǵa ketetin zııandy qaldyqtardy jylyna 36,1 myń tonnaǵa deıin azaıtýǵa múmkindik beredi. «Saryarqa» magıstraldy gaz qubyrynyń qurylysy barysynda shamamen 800 jumys orny jáne ony paıdalaný kezeńinde 225 jumys orny ashylady dep kózdelip otyr. Sonymen qatar Qaraǵandy, Aqmola oblystary jáne Astana qalasy ákimdikteri gaz taratý jelilerin jobalaý men salý máselelerin pysyqtap jatyr. Osylaısha taratý jelileriniń birinshi kezeńi gaz qubyrynyń qurylysy aıaqtalysymen 2019 jyldyń jeltoqsanynda qosylýǵa daıyn bolýy tıis.
«Saryarqa» gaz qubyrynyń birinshi bóligi, ıaǵnı «Qyzylorda – Jezqazǵan – Qaraǵandy – Temirtaý – Astana» baǵyty aǵymdaǵy jyldyń sońynda aıaqtalady degen jospar bar. Alaıda oǵan deıin jergilikti ákimdikter gazdy taratý júıelerin ázirleýi tıis. Sonda ǵana kógildir otyn tutynýshylarǵa taratylady. M.Myrzaǵalıevtiń aıtýynsha, gaz qubyry Qyzylordanyń Qaraózek aýylynan bastaý alyp, aldymen Astanaǵa, sodan soń Kókshetaý men Petropavlǵa deıin tartylady. «Gaz qubyry 2019 jyldyń aıaǵyna deıin Astanaǵa jetedi. Al magıstral bos turmaý úshin Qaraǵandy men Aqmola oblystary, sondaı-aq, Astana ákimdikteri gazdy taratý jelilerin jobalaýdy tezdetýi kerek. Biz arnaıy jınalys ótkizdik. Osy saladaǵy jumystar bastalyp jatyr. Árıne biraz ýaqyt qajet bolady. Degenmen gaz magıstrali Astanaǵa jetkende alǵashqy taratý júıeleri daıyn bolady. Qala ákimi de ýáde berip otyr. Gaz aldymen jylý elektr stansasyna, odan keıin Ońtústik-shyǵys shaǵyn aýdanyna tartylady», dedi vıse-mınıstr.
2014 jyly Úkimet Qazaqstandy 2015-2030 jyldarǵa deıin gazdandyrýdyń bas shemasyn bekitken bolatyn. Osy shemaǵa sáıkes gazdandyrý deńgeıin aǵymdaǵy 47 paıyzdan 2030 jylǵa qaraı 56 paıyzǵa deıin jetkizý kózdelip otyr. Bul 3 mln adamdy nemese 1,6 myńnan astam eldi mekendi gazben qamtamasyz etýge múmkindik bermek.
Dınara BITIK,
«Egemen Qazaqstan»