Naýryz aıynyń sońǵy kúnderi Ońtústik Qazaqstan oblysynda kóktemgi aýa raıy jurt kóleńke izdeıtindeı ysyǵan bolatyn. Sodan da bolar saýdasy jyl boıy úzilmeıtin balmuzdaqqa tábeti tartqandardyń sany ósken. Keshegi jumadaǵy jurtty eleń etkizgen oqıǵaǵa da dárigerler osy balmuzdaqty sebepker etýde.
Shymkent qalalyq juqpaly aýrýlar aýrýhanasyna beısenbiden bastap jedel ishek ınfeksııasy jáne ýlaný dıagnozymen aýrýlar túse bastaǵan. Naýqastardyń basym bóligi dárigerler kómegine túnde júgingen. Sóıtip juma kúni túske deıin 39 naýqas aýrýhanaǵa jatqyzylǵan. Osy oqıǵaǵa baılanysty ótkizilgen brıfıng Ońtústik Qazaqstan oblystyq densaýlyq saqtaý basqarmasy basshysynyń orynbasary Aıgúl Imanalına naýqastardyń 21-i –eresek, 11-i – on tórt jasqa deıingi bala jáne 7-eýi – jasóspirim ekenin málim etti.
«Ýlanǵandardyń arasynda jansaqtaý bóliminde jatqyzylǵan eki jasóspirim bala bólimshege aýystyryldy. Qazirgi ýaqytta jansaqtaý bóliminde júkti áıel ǵana jatyr. Barlyq naýqastyń jaǵdaıy turaqty, olarǵa tıisti em-dom kórsetilýde. Aýrýhanada tósek oryndary jetkilikti. Alǵashqy saraptaýlar nátıjesinde naýqastardyń dámhanada balmuzdaq jegeni anyqtalyp otyr. Naýqastar bir mezgilde túsken joq. Keıbiri 1-2 kún buryn densaýlyqtarynyń syr bere bastaǵanyn aıtýda», - deıdi ol.
Júkti áıeldiń densaýlyǵy dárigerlerdiń jiti qadaǵalaýyna alynǵan. OQO qoǵamdyq densaýlyq saqtaý departamenti basshysynyń orynbasary Jumaǵalı Medetovtiń málimdeýinshe, osy jaǵdaı boıynsha tekserý jumystary bastalypty.
«Departamentke juma kúni saǵat 10:23-te Shymkent qalalyq juqpaly aýrýlar aýrýhanasynan «jiti ishek ınfeksııasy», gastroenterıt dıagnozymen naýqastar túskeni jóninde habar keldi. Berilgen habarlamada naýqastardyń kóbi Shymkent qalasyndaǵy «Iýjnoe» dámhanasynyń kıoskisinen balmuzdaq jegen degen málimet keltirilgen. Sol boıynsha biz oblystyq qoǵamdyq densaýlyq saqtaý departamentiniń, qalanyń aýdandyq basqarma mamandarynan, oblystyq zerthana mamandarynan brıgada qurdyq. Olar aýrýhanaǵa túskender men balmuzdaqty satyp alǵan jerge, óz quziretteri sheńberinde, tolyq tekserý jumysyn júrgizip jatyr. Sol jerde jumys isteıtinderden saraptama alyndy. Bir brıgadamyz juqpaly aýrýlar aýrýhanasyndaǵy ár naýqaspen jeke-jeke sóılesip, máseleniń sebebin anyqtaýda. Olardyń jemis dámdes quıylmaly balmuzdaq jegeni belgili boldy. Tekserý qashan bitedi, sol kezde qorytyndysyn habarlaımyz», - dedi Jumaǵalı Medetov. Sondaı-aq ol saraptama qorytyndysy aldaǵy úsh kúnde belgili bolatynyn aıtty.
Ýlanǵandar sany jónindegi málimet juma kúni keshke qaraı ózgerdi. Oblystyq Ishki ister departamentiniń baspasóz qyzmeti balmuzdaqtan ýlanǵandardyń sany 41 adamǵa jetkenin málim etti. Azamattardyń jappaı ýlanýy boıynsha qylmystyq is qozǵalǵan.
«Shymkent qalalyq IIB Ál-Farabı aýdandyq polısııa bólimine juqpaly aýrýlar aýrýhanasynan 41 adam balmuzdaqtan ýlanǵany týraly habarlama kelip tústi. Atalǵan jaıt Ál-Farabı polısııa bóliminde sotqa deıingi tergeýdiń biryńǵaı tizilimine «sanıtarlyq qaǵıdalardy nemese gıgıenalyq normatıvterdi buzý» boıynsha tirkeldi. Saraptama taǵaıyndaldy. Polıseıler oqıǵanyń mán-jaıyn anyqtaýda», delingen departament habarlamasynda.
Al Qoǵamdyq densaýlyq saqtaý komıtetiniń baspasóz qyzmeti ýlanǵan adamdardyń barlyǵy jeke kásipkerge tıesili saýda núktesinen jemis dámdes balmuzdaq jegenin, aldyn ala boljamǵa sáıkes, balmuzdaqqa arnalǵan qospa úı jaǵdaıynda jasalǵanyn habarlady. Aıta ketelik, jaǵdaıdy Densaýlyq saqtaý mınıstrligi óz baqylaýyna alǵan.
Ǵalymjan ELShIBAI, «Egemen Qazaqstan»