Qyzylorda oblysynda Qazaqstan Respýblıkasy Parlamenti Májilisi tóraǵasynyń orynbasary Vladımır Bojko bastaǵan depýtattar halyqpen kezdesýdi jalǵastyryp jatyr dep habarlaıdy «Egemen.Kz» tilshisi.
Keleli jıynda Elbasynyń «Áleýmettik bes bastamasyn» júzege asyrýdyń tetikteri túsindiriledi.
QR Parlamenti Májilisiniń depýtaty Keńes Ábsattarov bes bastamanyń birinshisinde turǵyn úı ıpotekasynyń qoljetimdiligin qamtamasyz etý kózdelgendigin aıtady. «7-20-25» baǵdarlamasynda nesıe boıynsha syıaqy mólsherlemesi qazirgideı 14-16 emes, jylyna 7 paıyzdan joǵary bolmaıdy. Eger bankter búginde alǵashqy jarnanyń 30, keıde 50 paıyzyn talap etse, osy baǵdarlama boıynsha bastapqy jarna 20 paıyzdan aspaıdy. Aı saıynǵy tólemdi azaıtý úshin nesıe merzimi 25 jylǵa uzartylǵan.
Ekinshi baǵyttaǵy salyq kodeksine engiziletin ózgeris tabysy az azamattar úshin qoldaý bolmaq. Depýtattar bul jumys usynyp otyrǵan tarap úshin de tıimdi deıdi.
Elimizdiń jalpy ishki ónimniń 27 paıyzyn shaǵyn jáne orta bıznesten túsken tabys quraıdy. Ony arttyrý úshin Elbasy bul salany da bes basymdyqqa qosty. Máselen, jospar boıynsha kásipkerlikke 30 mılıard teńge qarjy qaralǵan bolsa, baǵdarlama sheńberinde qosymsha 13 mıllıard 900 mılıon teńge bólinip otyr.
Bul qarjy shaǵyn jáne orta kásiptiń tynysyn ashady. Májilismender bastamadaǵy basymdyqtardy osylaısha túsindirip júr.
Baqtııar TAIJAN,
«Egemen Qazaqstan»
Qyzylorda oblysy