Memorandým sheńberinde eki jaq aýyl sharýashylyǵyn sıfrlandyrý jumystaryn atqaratyn bolady. Osydan shamaly kún buryn oblys ákiminiń orynbasary Meıirjan Myrzalıev basqarǵan delegasııa Arhımed Muhambetovtyń tapsyrmasymen Astana jáne Almaty qalalarynda bolyp, aýyl sharýashylyǵyn sıfrlandyrýǵa baılanysty iri eki bilim ordalarynda mańyzdy kezdesýler ótkizgen bolatyn.
Delegasııa osy saparynda S.Seıfýllın atyndaǵy qazaq agrotehnıkalyq ýnıversıteti bazasyndaǵy sıfrlandyrý salasynda bilim taratý ortalyǵynda bolyp, «QATÝ» AQ basqarmasynyń tóraǵasy Aqylbek Kúrishbaevpen kezdesken edi. Sol kezdesýde aıtylǵan máseleler boıynsha endi bilim ordasynyń delegasııasy Qostanaı oblysyna keldi.
Kezdesýde oblys ákimi Arhımed Muhambetov Prezıdent tapsyrǵan ekonomıkanyń jáne áleýmettik salalardyń barlyǵyn sıfrlandyrý jumystarynyń oblysta bastaý alǵanynan habardar etti.
«Ol úshin oblysta «Sıfrlandyrýdyń jol kartasy» jasaldy, onda ómirge engiziletin 70 jobanyń 30-y aýyl sharýashylyǵy salasynda atqarylatyn bolady. Biz osy jobalardy júzege asyrý úshin barlyq baılanystardy, múmkindikterdi paıdalanatyn bolamyz. Sondyqtan búgingi kezdesýdiń, eki jaqty qol qoıylatyn memorandýmnyń mańyzy zor» dedi oblys ákimi Arhımed Muhambetov. Munan keıin Aqylbek Kúrishbaev S.Seıfýllın atyndaǵy qazaq agrotehnıkalyq ýnıversıtetiniń bazasyndaǵy aýyl sharýashylyǵyn sıfrlandyrý tehnologııasy transferti týraly áńgimeledi.
Rektor sıfrlandyrýdy damytýda úsh baǵyt jáne úsh blok máselelerdi usynatynyn aıtty. Birinshi másele tabıǵı resýrstardy, onyń ishinde jer resýrstaryn memlekettik organdardyń qadaǵalaýy bolyp tabylady. Sıfrlandyrý, jasandy ıntellektini qosýdyń arqasynda onyń 95 paıyzy kosmostan qadaǵalatyn bolady. Ekinshi másele naqty jer paıdalanýda tehnologııany paıdalanýǵa baılanysty. Úshinshi máselede Qostanaı oblysymen yntymaqtasa jumys isteý, tehnologııalardy paıdalanýdy qarastyrylady.
Kezdesýde delegasııa músheleri, sıfrlandyrý tehnologııalary boıynsha úlken ǵalym- mamandar osy aıtylǵan máselelerdi taratyp, tereńirek toqtaldy. Kezdesýde eki jaqty yntymaqtasý memorandýmyna qol qoıyldy.
Názıra JÁRIMBET,
«Egemen Qazaqstan»
Qostanaı