Qyrǵyz Respýblıkasynyń Prezıdenti Sooronbaı Jeenbekov 9 sáýir kúni resmı saparmen Túrkııa Respýblıkasyna bardy.
Ankara qalasyndaǵy «Esenbuǵa» halyqaralyq áýejaıynda Sooronbaı Jeenbekovti Túrkııa Respýblıkasynyń vıse-premer-mınıstri Hakan Chavýshoglý, Ankara oblysynyń gýbernatory Erjan Topaja, Ankara meri Mýstafa Týna, Ankara aýmaqtyq garnızonynyń basshysy Alı Sıvrı jáne ózgeler kútip aldy.
Qyrǵyzstan prezıdenti saparynyń alǵashqy kúni Túrkııa basshysy Rejep Taıyp Erdoǵanmen kezdesti. Kezdesý barysynda prezıdentter ekonomıka, ınvestısııa, aýyl sharýashylyǵy, sport, áleýmettik qamtý, aqparat jáne baspa salalarynda yntymaqtastyq ornatý týraly eki jaqty qujattarǵa qol qoıdy. Qujattarǵa qol qoıý rásiminen keıin ótken baspasóz máslıhatynda Erdoǵan «Qyrǵyzstan - Túrkııa úshin orny erekshe el», dedi.
Qyrǵyzstan prezıdenti Túrkııa premer-mınıstri men parlament spıkerimen kelissóz júrgizip, osy elde turatyn qyrǵyz dıasporasy ókilderimen kezdesti. Sondaı-aq Shyńǵys Aıtmatov eskertkishine gúl qoıyp, jazýshyny bir mınýt únsizdikpen eske aldy.