Astana qalasyna jumys saparymen Reseı Federasııasy ulttyq ulany áskeri federaldy qyzmeti dırektorynyń – RF ulttyq ulany áskeri bas qolbasshysynyń orynbasary general-polkovnık Sergeı Zaharkın bastaǵan delegasııa keldi.
Áskerı delegasııa ókilderin Ulttyq ulan bas qolbasshysy general-leıtenant Rýslan Jaqsylyqov qarsy alyp, ekijaqty kezdesý aıasynda taraptar arasyndaǵy ózara yntymaqtastyqty tereńdetýge baǵyttalǵan áriptestik týrasynda áńgime órbidi. Sondaı-aq reseılik mamandar sapar aıasynda Ulttyq ulannyń qurylymy men damý basymdyqtary jáne tapsyrmalardy oryndaý múmkindikterimen tanysty.
Al oraıy kelgende óz pikirin bildirgen Sergeı Zaharkın Reseı ulttyq ulan áskeri federaldy qyzmetine qazaqstandyq áriptesterimen tájirıbe almasý mańyzdy ekenin tilge tıek etti.
«Bul bizdiń áskerimizge júrgizilgen reformadan keıingi Qazaqstanǵa jasaǵan alǵashqy saparymyz. О́zderińiz biletindeı, Reseı Federasııasynyń ishki áskeri 2016 jyldan bastap Reseı Federasııasy ulttyq ulan áskeri federaldy qyzmeti bolyp qaıta quryldy. Reseı men Qazaqstan ulandarynyń tapsyrmalar oryndaýdaǵy keıbir salalarynda ǵana aıyrmashylyq bolmasa, negizinen qyzmet túri birdeı», – dedi ol.
Sonymen qatar S.Zaharkın Reseı ulttyq ulany reformalanǵannan keıin ekstremızm men terrorızmge kúres júrgizý baǵyttary keńeıgendigin atap ótti.
Al R.Jaqsylyqov bolsa, qoǵamǵa tónetin qaýip-qater túrleriniń de kúsheıýi irgeles elderdi ózara yntymaqtastyqqa úndeıtinin jetkizdi.
«Osy oraıda, ekijaqty tájirıbe almasýdyń mańyzy zor ekeni sózsiz. Biz osy kezge deıin de birneshe ret birlesken oqý-jattyǵýlar ótkizdik. Onyń biri – ótken jyly uıymdastyrylǵan «Nerýshımoe bratstvo-2017» oqý-jattyǵý sharasy. Al bıyl Qazaqstan «Kobalt-2018» oqý-jattyǵý jıynyn ótkizýdi mindetine alyp otyr. Bolashaqta júzege asyratyn birlesken maqsat-mindetterimiz de az emes. Sondyqtan da biz árqashan da tyǵyz qarym-qatynasymyzdy odan saıyn tereńdetýge daıynbyz dep aıtqym keledi», dedi general-leıtenant R.Jaqsylyqov.
Kezdesý aıasynda aldaǵy mamyr aıynda Almaty oblysynda ótetin UQShU (Ujymdyq qaýipsizdik shart uıymy) JÁUK (Jedel áreket etý ujymdyq kúshteri) «Kobalt-2018» oqý-jattyǵýlaryn ótkizý máselesi de talqylandy. Sóıtip ózara qurmet negizindegi tyǵyz baılanys pen keń kólemdi ekijaqty yntymaqtastyqty damytýǵa ýaǵdalasty. Atap aıtqanda, olar áskerı kadrlar daıarlaý men mamandar biliktiligin arttyrý, vedomstvoaralyq qarym-qatynasty qamtamasyz etý men uıymdastyrýda tájirıbe almasý, mádenı jáne sporttyq yqpaldastyq ornatýǵa negizdelgen.
Kezdesý sońynda taraptar RF ulttyq ulan áskeriniń áskerı oqý oryndarynda Qazaqstan Respýblıkasy Ulttyq ulany áskerı qyzmetshilerin oqytý týraly kelisimshartqa qol qoıdy. Esterińizge salar bolsaq, taraptar arasyndaǵy alǵashqy kelisimshartqa 2009 jyly qol qoıylyp, sodan beri qazaqstandyq áskerı baılanysshylar, kınologter, tehnıka mamandary reseılik áskerı oqý oryndarynda bilim alǵan edi.
Sapar aıasynda reseılik delegasııa ókilderi Ulttyq ulannyń Áskerdi basqarý ortalyǵyn aralap, Ulttyq qorǵanys ýnıversıtetinde boldy. Sonymen qatar Ulttyq ulannyń astanalyq jedel brıgadasynda bolyp, áskerı qalashyqtyń ınfraqurylymy men tehnıka, qarý-jaraq úlgileri jáne taǵy basqa nysandarymen tanysty.
Serik ÁBDIBEK,
«Egemen Qazaqstan»