Mańǵystaý oblysynda ótken apparattyq jıynda eksporttyq saıasat jáne eksporttaýshylardy qoldaý, tutynýshylardyń quqyqtaryn qorǵaý máseleleri, transport pen logıstıkany sıfrlandyrý máseleleri qaraldy.
Apparat otyrysynda eksporttyq saıasat jáne eksporttaýshylardy qoldaý týraly Mańǵystaý oblystyq ındýstrııalyq-ınnovasııalyq damý basqarmasy basshysynyń mindetin atqarýshy Talǵat Abdyqadyrov baıandady.
Mańǵystaý oblysy eksporttyq-ımporttyq operasııalardy álemniń 89 elimen júzege asyrady, onyń ishinde eksporttyq operasııalardy 37 elmen, ımporttyq operasııalardy 86 elmen qarym qatynas jasaıdy (ımportty Armenııa, Aýǵanstan jáne Týnıs elderimen júzege asyrady).
2017 jyly Mańǵystaý oblysynyń taýar aınalymy 4 556,6 mln. AQSh dollaryn qurady, bul ótken jylmen salystyrǵanda 18,2% ósken. Syrtqy saýda teńgeriminiń oń saldosy 4 006,6 mln. AQSh doll. qurady. Sondaı-aq, 2018 jylǵa qaraı aımaq boıynsha taýarlar eksporty 28,7 mln. AQSh dollaryn quraıdy dep kútilýde.
Aımaqtaǵy eksportqa baǵdarlanǵan kásiporyndarǵa qoldaý kórsetý úshin birqatar is-sharalar júrgizildi. 2017 jyly AQ "Qazazot", "Eksporttaýshy-2020" jelisi boıynsha jalpy somasy 6,0 mlrd. teńge jeńildikpen kredıt berildi (9,0%). Astyq termınaly "Aq-bıdaı" "Eksporttaýshy-2020" baǵdarlamasy aıasynda "sheteldegi ınvestısııalardy saqtandyrý " quralyn paıdalandy. "О́nimdilik 2020 "Baǵdarlamasy sheńberinde" "Qazazot" JShS ındýstrııalyq-ınnovasııalyq jobany ázirleýge jáne saraptaýǵa arnalǵan josparyn jasaqtaýǵa jumsalǵan 3 mln. teńge shyǵynyn memleket ótedi. "О́nimdilik 2020 "Baǵdarlamasy sheńberinde" AO "Arcellor Mittal Products Aktau" AQ quzyrettiligin arttyrýǵa jumsalǵan 14 mln. teńge shyǵyndaryn memleket ótedi.
Tutynýshylardyń quqyqtaryn qorǵaý máseleleri týraly Mańǵystaý oblysy boıynsha tabıǵı monopolııany retteý jáne básekelestikti qorǵaý departamentiniń basshysy Serjan Sıhymbekuly málimdedi. Aǵymdaǵy jyldyń 1 qańtar aıynan bastap tutynýshylardyń quqyqtaryn qorǵaý salasynda 50 ótinish tústi. Kóbinese tutynýshylar quqyqtarynyń buzylýy sapasyz taýar satyp alýmen, sapaly qyzmet kórsetilýmen baılanysty bolady. Oblys turǵyndary kóbinese sapasyz taýardy qaıtaryp berý, jıhazǵa tapsyrys bergende sapasyz qyzmet túrin alý sııaqty máselelermen kezdesedi.
Transport pen logıstıkany sıfrlandyrý týraly oblystyq jolaýshylar kóligi jáne avtomobıl joldary basqarmasynyń basshysy Álibı Kósherbaev baıandama jasady.
Qazirgi ýaqytta Mańǵystaý oblysynyń aýmaǵynda áýe, temirjol, teńiz jáne jolaýshylar tasymaly jumysynda sıfrlandyrý baǵdarlamasy qoldanylady. Avtobýs parkin jańartqannan keıin, jolaýshylar tasymaly men elektrondyq bıletterdi baqylaý júıesi - «InfoBus» mobıldi qosymshasy iske qosylady. Bul júıe kólik quraldarynyń qozǵalysyn, onyń belgilengen baǵdardan aýytqýyn, kórsetilgen baqylaý núkteleriniń naqty kelýin, toqtaý ýaqytyn jáne sapar ýaqytyn qadaǵalaýǵa múmkindik bermek.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy