Aqparat jáne kommýnıkasııalar mınıstriniń 2017 jylǵy atqarǵan jumystary men aldaǵy josparlary týraly halyq aldyndaǵy eseptik kezdesýi ótti. Jıynǵa Astana qalasynyń turǵyndary, sarapshylar qaýymdastyǵynyń jáne úkimettik emes uıymdardyń ókilderi qatysty. Jıynda baıandama jasaǵan mınıstr Dáýren Abaev vedomstvo aldyna qoıylǵan mindetterdiń oryndalý barysyna toqtalyp, aqparat pen kommýnıkasııa, sondaı-aq halyqqa qyzmet kórsetý salalarynda júzege asyp jatqan jobalar týraly málimdedi.
Elbasy bastamalary, elimizdiń aqparattyq saıasaty, memleket atqaryp jatqan irgeli sharalar týraly halyqqa jan-jaqty aqparat berý isinde respýblıkalyq Biryńǵaı medıa jospardyń tıimdi júzege asyp jatqanyn atap ótken mınıstr telekommýnıkasııa ınfraqurylymyn damytý baǵytyndaǵy ilkimdi isterge de toqtaldy.
Sonyń ishinde, erekshe atap aıtatyn másele, mınıstrlik bıyldan bastap elimizdiń aımaqtaryn kezeń-kezeńimen sıfrlyq habar taratýǵa kóshire bastaıdy. Jyl sońyna deıin Mańǵystaý, Jambyl men Ońtústik Qazaqstan oblystarynda teleradıo habarlaryn taratý isi tolyq sıfrlyq formatqa almastyrylady. Sonymen qatar, analogtyq habar taratý toqtatylady. Al elimizdiń ózge de óńirleri sıfrlyq habar taratýǵa 2020 jyldyń sońyna deıin kóshiriledi dep josparlanyp otyr. Bul joba elimizdiń kórshi eldermen irgeles jatqan eldi mekenderge qatysty kópten beri aıtylyp kele jatqan ózekti másele – jergilikti turǵyndar úshin otandyq telearnalar men radıolardyń qoljetimdi bolýyn qamtamasyz etpek.
– Aýyldy jerlerde 15-ke jýyq, al oblys ortalyqtarynda 30-daı joǵary sapaly telearna tegin kórsetiledi. Sondaı-aq «Otaý TV» otandyq spýtnık operatoryn damytý maqsatynda jańa «Otaý+» aqyly paketin iske qosýdy josparlap otyrmyz. Onyń quramynda sheteldik túrli janrdaǵy belgili 14 telearna bolady, – dep atap ótti Dáýren Abaev. 2017 jyldyń sońynda Aqparat jáne kommýnıkasııalar baǵytyndaǵy zańǵa ózgertýler men tolyqtyrýlar engizilgenin aıtqan mınıstr, qoǵamdyq oryndarda, memlekettik organdar men uıymdarda tek qana otandyq telearnalardy kórsetý qajettiligi týraly mindetteme belgilengenin alǵa tartty. Sondaı-aq Elbasy tapsyrmasy boıynsha júzege asyrylyp jatqan «Sıfrly Qazaqstan» memlekettik baǵdarlamasy aıasyndaǵy jobalar jóninde baıandaı kele, qala men aýyl arasyndaǵy sıfrlyq teńsizdikti joıýdyń mańyzdylyǵyna ekpin qoıdy.
– Qazir elimizdiń 13 mıllıonnan astam turǵynyna joǵary jyldamdyqty ınternet qoljetimdi. 10 myńnan astam turǵyny bar eldi mekenderde 3G, al 50 myńnan astam turǵyny bar eldi mekenderde 4G úlgisindegi baılanys ornatylǵan. О́tken jyly elimizdegi barlyq aýdan ortalyǵy 4G úlgisimen qamtyldy. Mınıstrliktiń aldaǵy ýaqytta atqaratyn mindeti – aýyldyq eldi mekenderge keńjolaqty ınternet jetkizý. Ol úshin qazirgi kezde Memleket pen jekemenshik seriktestigi boıynsha tıisti joba iske asyrylyp jatyr. Atalǵan joba aıasynda 2021 jylǵa deıin 2 mıllıonnan astam turǵyny bar 1249 aýyldyq eldi meken joǵary jyldamdyqty ınternet jelisimen qamtylady, – dedi Dáýren Abaev. Bul óz kezeginde aýyl sharýashylyǵyn sıfrlandyrý, elektrondy saýda men qarjy tehnologııalaryn damytý syndy baǵdarlamanyń negizgi mindetterine jol asha túseri sózsiz.
Halyqqa qyzmet kórsetý salasynda da atqarylǵan jumystar aýqymdy. Búginde «Azamattarǵa arnalǵan úkimet» memlekettik korporasııasy barlyq memlekettik qyzmetterdiń 83 paıyzyn (621 qyzmet) kórsetip keledi.
Ekonomıkalyq tıimdilikti arttyrýdyń zamanaýı múmkindikterin damytý boıynsha mınıstrlik proaktıvti qyzmetter (HQKO-ǵa barýdy talap etpeıtin), «Paper free» prınsıpi (tolyqtaı qaǵazsyz úderis), sıfrly halyqqa qyzmet kórsetý ortalyqtaryn qurý baǵyttary negizinde atqarylatyn mindetterdi jalǵastyra berdi. Bul taraptaǵy jobalaý prosesteri boıynsha tájirıbe jetile túsetinin aıtqan mınıstr jyl sońyna deıin sıfrly halyqqa qyzmet kórsetý ortalyqtary respýblıkanyń ár oblys ortalyǵynda ashylatynyn jetkizdi.
– Endi HQO-nyń jumysy tolyǵymen avtomattandyrylyp, qyzmetterdi operatordyń kómeginsiz alýǵa bolady. Alǵash ret mundaı HQO Astanada jyl basynda ashylǵan edi. Onyń ashylýyna deıin rezıdent emes tulǵalar alty mekemege deıin baryp, árqaısynda jeke kezekke turýǵa májbúr bolatyn. Búginde bul qyzmetterdiń barlyǵy bir jerde «bir tereze» qaǵıdaty boıynsha beriledi, – dedi mınıstr.
Jurtshylyqpen kezdesýde mınıstr uıaly baılanys qyzmetine, elektrondy úkimet jumysyna, BAQ salasyndaǵy máselelerge qatysty jıynǵa qatysýshylar qoıǵan jáne mınıstrlik blogyna kelip túsken birqatar suraqtarǵa jaýap berdi. Mınıstrdiń sózine qaraǵanda, shalǵaıdaǵy eldi mekenderdi uıaly baılanyspen qamtý sharalary jalǵasa beredi. «Qazir myńnan astam turǵyny bar eldi mekenderde uıaly baılanys bar. Taǵy osyndaı 500 eldi mekenge baılanys qyzmetin jetkizý josparlanyp otyr. Bul tarapta uıaly baılanys operatorlaryna tıisti mindettemeler júkteldi», dedi halyqqa esep berý kezdesýinde Aqparat jáne kommýnıkasııalar mınıstri.
Aıa О́MIRTAI,
«Egemen Qazaqstan»