Astanaǵa alǵash kelgenimiz áli kúnge kóz aldymda. Osydan 20 jyldan astam ýaqyt buryn Elbasy Jarlyǵyna sáıkes kishi ulym otbasymen birge Arqa jerine, Aqmola qalasyna qyzmet babymen qonys aýdardy.
1997 jyldyń qysynda astanaǵa kelip, balamyzdyń úıinde eki apta jatqanymyz bar. Sondaǵy jaǵdaı esimnen ketpeıdi. Sol jyly qys qaharly boldy. Úı sýyq, jylý berý júıesi qanjylym ǵana. Elektr jaryǵy qaıta-qaıta óship qalatyn. Tipti ájesi Mákeń ekeýmizdi tońbasyn dep nemerelerim aıaǵymyzǵa jún kórpe orap qoıýshy edi...
Dese de ol ýaqytsha qıyndyq edi. Balalaryma jiger berip, «áli-aq astana qaryshtap damıdy. Kóp adamnyń qoly jetpes kórikti shaharǵa aınalady» deıtinmin. Shyny sol. Qazir sonyń bárin keıbireý bilgisi de, eske alǵysy da kelmeıtindeı. Biraq ol bizge tarıhtan taǵylym, ótkennen sabaq alýymyz úshin kerek. Baıaǵyda Aıaz bı eski kıimderin tórge ilip qoıyp, keýdesin pendelik pıǵyl kernegen sátte soǵan qarap, ótkenin eske túsirip, táýbesine kelip otyratyn bolǵan desedi. «Aıaz, álińdi bil, qumyrsqa, jolyńdy bil» degen támsil sodan qalǵan bolsa kerek.
Ár jyly kelgen saıyn elordada sáýletti ǵımarattar, kórikti úıler salynyp, halyqqa neshe túrli qyzmet kórsetetin oıyn-saýyq ortalyqtary boı kótergenine kýá bolatynbyz. Bir kelgenimizde «Báıterek» monýmenti, keleside «Dýman» oıyn-saýyq ortalyǵy, taǵy birde Han Shatyr astanalyqtar men qonaqtardyń kózaıymyna aınalǵanyn kórip qýandyq.
Elimiz úshin byltyrǵy jyl erekshe jemisti jyl boldy. Astanada EKSPO halyqaralyq mamandandyrylǵan kórmesi úlken tabyspen ótti. Kórmeni tamashalaǵan halyqta esep joq. Ásirese, balalardyń qýanyshyn aıtsańshy! Osynyń bári Elbasynyń eren eńbegi, ıgi bastamasy, sarabdal saıasaty ekeni shúbásiz. Biz aǵa býyn ony jaqsy túsinemiz, sondyqtan jastarǵa sabaq bolsyn, úlgi bolsyn dep aıtamyz.
Astanada qazir mıllıonnan astam halyq turady. Solardyń arasynda balalarymyz, nemerelerimiz baryn árdaıym maqtan etemiz. Elordada nemerelerim er jetip, oqý oqyp, azamat boldy. Balalarymyz dos arttyrdy. Biz ǵana emes, Qazaqstannyń túkpir-túkpirinen kelgen beıtanys jandar kóp ýaqyt ótpesten bir-birimen aǵaıyn-baýyr, dos-jaran, jekjat bolyp aralasyp-quralasyp ketkenine shúkirshilik deımiz.
Buryndary qazaq jaqsy elmen, tekti áýletpen quda bolý úshin artynyp-tartynyp, aıshylyq alys jer júretin bolǵan ǵoı. Atalarymyzdyń ondaǵy oıy – «qan jańarsyn, urpaq aralassyn» degen kóregendik, tektilik qasıet. Bul jaǵynan da utqanymyz kóp. Urpaqtarymyz teńin taýyp, jaqsy adamdarmen qudandaly boldyq.
Búginde elorda barsha qazaqtyń basyn qosqan qutty mekenge aınaldy. Astanaǵa kelgen aǵaıynnyń aýyzbirligi artyp, yntymaǵy nyǵaıdy. El irgesi bekip, shańyraǵymyz keńidi, yrysymyz artty. Aınalasy jıyrma jylda Astananyń baq-bereke mekeni, beıbitshilik qalasy bolǵany osydan bilinedi dep oılaımyn.
Aldaǵy ýaqytta da bas qalanyń qaryshtap damı beretinine senimim mol. Jaqynda jańa aýdan ashylǵanyn estip jatyrmyz. «Baıqońyr» aýdanynyń elordanyń odan ári kórkeıýine qosar úlesi zor bolsyn deımin.
«Kóppen kórgen – uly toı» dep halqymyz beker aıtpaǵan. Astananyń jıyrma jyldyq mereıtoıy qutty bolyp, elimiz ósip-órkendeı bersin dep seksenniń seńgirine shyqqan aqsaqaldyq batamdy bergim keledi.
Súleımen KО́ShKINOV,
eńbek ardageri,
Almaty oblysynyń qurmetti azamaty
Almaty oblysy,
Jarkent qalasy