«Bolashaqqa baǵdar: rýhanı jańǵyrý» baǵdarlamasy aıasynda Qazaq memlekettik qyzdar pedagogıkalyq ýnıversıtetiniń bir top ǵalymdary «Bir aptaǵa - aýylǵa» kásibı-tanymdyq ekspedısııa quramynda Almaty oblysynyń birqatar aýyldaryn aralap qaıtty.
Ýnıversıtet rektory G.Aldambergenovanyń bastamasymen uıymdastyrylǵan jumys toby kıeli jerler men keshenderdi anyqtap, ǵylymı-zertteý jumystaryn júrgizý maqsatynda jolǵa shyqqan bolatyn.
Pedagogıka ǵylymdarynyń kandıdaty G. Abdrasılova jetekshilik etken ekspedısııa músheleri maýsym aıynyń alǵashqy kúnderinde Kerbulaq, Sarqan, Panfılov, Ile jáne Jambyl aýdandaryn aralady.
Kásibı-tanymdyq ekspedısııa barysynda ýnıversıtet ǵalymdarynyń joǵary biliktiligi men uıymshyldyǵynyń arqasynda josparlanǵan jumystar óz deńgeıinde oryndaldy. Tól tarıhymyzdyń negizderin ǵylymı túrde dáıektep, mádenı-rýhanı qundylyqtarymyzdy jańasha saraptaýdy maqsat etken ǵalymdar is-sapar barysynda atalǵan aýdandardaǵy bilim berý mekemelerimen yntymaqtastyq ornatyp, aımaqtaǵy kıeli jerler boıynsha birlesken ǵylymı-zertteý jobalaryn júzege asyrýdyń josparyn túzdi. Mektep oqýshylarynyń ǵylymǵa degen qyzyǵýshylyǵyn arttyryp, kásiptik baǵdar berip, osy aımaqtardaǵy «Qazaqstannyń 100 kıeli oryndarynyń» tizimine kiretin nysandarǵa ári kópshilikke beımálim kıeli, qasıetti oryndarǵa ekskýrsııa jasady.
Elimizdiń qasıetti jerlerin túgendeý, qaǵazǵa túsirý tizimdeýmen aıaqtalmaıtyny anyq. Áli de ashylmaǵan, aıqyndalmaǵan tarıhı nysandar bar. Osy oraıda izdeý jumystaryn ary qaraı jalǵastyrý, aımaqtaǵy tarıhı tulǵalardy, kıeli oryndardy anyqtaý maqsatynda jergilikti turǵyndarmen birlese zertteýler uıymdastyrý, sonymen birge zertteýler nátıjesin oqýlyqtarǵa engizý aldaǵy ýaqyttyń enshisinde.
Ýnıversıtet ǵalymdarynyń bastamasy Qazaqstannyń túkpir-túkpirinde osyndaı ekspedısııalar uıymdastyrýǵa úndeıdi. Mundaı is-saparalar jastar arasynda patrıotızmdi nasıhattap, el men jerdi qurmetteýge shaqyrady.
Jandar ASAN
ALMATY