О́tken chempıonattyń tartysyn qyzdyryp, tórt jyldyqtyń basty sensasııasyna balanǵan Kosta-Rıka quramasy bul joly da saılanyp otyr. 2014 jyly olar shırek fınalǵa deıin jetse, bıyl odan árige baramyz dep maqsat qoıdy. Qaıta-qaıta batpan quıryq bularǵa qaıdan bolsyn dep oılaǵandarǵa qarsy aıtar ýájimiz bar. Sonymen qatar bul komandada Elsın esimdi fýtbolshy óner kórsetedi.
2014 jyly Brazılııada atoı salǵan Kosta-Rıka quramasyn sol kezdegi el prezıdenti Fabrısıo Alvaradonyń ózi qoldap, jankúıerler arasynan tabyldy. Otandastary soqqan árbir golǵa prezıdent balasha qýandy. Ulttyq qurama fýtbolshylary onyń is-áreketinen shabyt alyp, arqalana oınady. Bıyl 2 sáýirde Kosta-Rıka jańa prezıdentti saılady. Keıinnen anyqtalǵanda Fabrısomen tegi birdeı Karlos Alvarado da fýtbolǵa salǵyrt qaramaıtyn adam bolyp shyqty. Jergilikti jýrnalısterdiń jazýyna sensek, jańa prezıdent te el astanasy San-Hoseniń basty alańynda úlken ekrannan qurama oıynyn tamashalaýdy josparlap otyr. Demek fýtbolshylar bul joly da el namysyn qoldan bermeı, basshylaryn jerge qaratpaýy tıis.
Kosta-Rıka quramasy ótken jyldyń tamyzynan beri AQSh-ty artqa tastap, FIFA reıtıngisinde 16-orynǵa kóterildi. Sonyń arqasynda olar jerebe tartý rásimi kezinde KONKAKAF konfederasııasynyń nómiri birinshi komandasy bolyp eseptelindi. Biraq báribir de Kosta-Rıkanyń tobyna Brazılııa men eýropalyq 2 birdeı ujym tústi. Sondyqtan da kostarıkalyqtar jerebe joldas bolmady dep qynjylady. Eýropalyq ujymnyń biri tegeýrindi Shveısarııa bolsa, ekinshisi odan asqan Serbııa. Al Brazılııamen teń shaıqasýdyń ózi qandaı qıyn ekeni belgili.
Kosta-Rıka quramasynyń basty juldyzy – Keılor Navas. «Real» Madrıd» komandasynyń negizgi qaqpashysy ótken chempıonattan beri ıspan klýbyna aýysyp, klýbtyq deńgeıde birshama jetistikterge jetti. Navas qazir de babynda. «Jaqsy qaqpashy – jarty komanda» degen qaǵıdaǵa sensek, qorǵanysy myǵym Kosta-Rıka azýly qarsylasqa qarsy oıynda qorǵanysqa myqtap ornyǵýy múmkin. Reseıdegi birinshilikte jýrnalıster qaýymy Kosta-Rıka quramasynyń jartylaı qorǵaýshysy Elsın Tehadaǵa kóptegen saýaldar daıyndap otyr. Bul fýtbolshynyń ákesi Borıs Elsınniń jeke tabynýshysy bolǵanǵa uqsaıdy.
Kosta-Rıka quramasynyń tizimi:
• qaqpashylar: Keılor Navas («Real», Ispanııa), Parık Pemberton («Alahýelense»), Leonel Moreıra (Eredıano).
• qorǵaýshylar: Krıstıan Gamboa («Seltık», Shotlandııa), Iаn Smıt («Norchepıng», Shvesııa), Ronald Matarrıta («Nıý-Iork Sıtı», AQSh), Braıan Ovedo («Sanderlend», Anglııa), Oskar Dýarte («Espanol», Ispanııa), Djankarlo Gonsales («Bolonıa», Italııa), Fransısko Kalvo («Mınnesota Iýnaıted», AQSh), Kendall Ýoston («Vankýver Ýaıtkeps», MLS), Djonnı Akosta («Agılas», Kolýmbııa).
• jartylaı qorǵaýshylar: Davıd Gýsman («Portlend Tımberz», AQSh), Elsın Teheda («Lozanna», Shveısarııa), Selso Borhes («Deportıvo», Ispanııa), Rendall Asofeıfa (Eredıano), Rodnı Ýollas («Nıý-Iork Sıtı», AQSh), Braıan Rýıs («Sportıng», Portýgalııa), Danıel Kolındres, Krıstıan Bolanos (ekeýi de – Saprıssa).
• shabýylshylar: Hoan Venegas (Saprıssa), Djoel Kempbell («Betıs», Ispanııa), Marko Ýrenıa («FK Los-Andjeles», AQSh).
Ermuhamed MÁÝLEN,
«Egemen Qazaqstan»