Shardara aýdandyq ishki ister basqarmasynyń tańerteńgi jeke quram jınalysynda Shardara AII basqarmasy krımınaldy polısııasy bóliminiń bastyǵy, polısııa maıory Nurjan Atamqulov saqshylarǵa óndiristerindegi qylmystyq ister boıynsha zerdeleý-zertteý jumystaryn júrgizýdi tapsyrdy.
Krımınaldy polısııa bóliminiń jedel ýákili, polısııa aǵa leıtenanty Sábıtjan Aıazhanov pen jol patrýldik polısııa vzvodynyń komandıri, polısııa aǵa leıtenanty Beksultan Keńesov qaladaǵy Qazybek bı kóshesiniń boıymen kele jatty. Oılarynda basqarma bastyqtarynyń tapsyrmasyn oryndaý ǵana bolatyn. Kenet olar kóp qabatty úılerdiń birinen órt shyǵyp jatqanyn baıqap qaldy. Oılanyp turýǵa ýaqyt joq. Ekeýi birdeı qyzyl jalyn oranǵan úıge qaraı umtyldy. Jaqyndaǵanda baryp baıqady, órt №6-úıdiń ekinshi qabatyndaǵy №11-páterdiń balkonynan shyǵyp jatyr eken. Eki polıseı baspaldaqpen ekinshi qabatqa tez-aq kóterildi. Alaıda páterdiń esigi qulyptaýly eken. Qyrsyq qylǵanda esigi temirden bolar ma! Kórshilerden surastyryp kórgende páterde adam bolýy múmkin ekenin bildi.
Osy kezde basqa páterlerdiń turǵyndary da jınalyp, mańaı azan-qazan boldy da ketti. Árkim óz bastaryn oılap qaıǵyryp jatyr. Eger myna órt órship, qarqyn alsa, qyzyl jalynnyń boı bermeı keterin de oılap, turǵyndar shý-shý etedi. Beksultan men Sábıtjan turǵyndardy sabyrǵa shaqyryp, temir esik tutqynynda qalǵan jandy ajal tyrnaǵynan qalaı arashalap alý kerektigin aqyldasty. Mundaıda asyp-sasqan adamdardyń oıyna eshteńe de kelmeıdi.
– О́rt sóndirýshilerdi shaqyraıyq, – dedi biri.
– Terezeden túseıik, dedi ekinshisi.
Alaıda munyń ekeýine de úlgermeıtin edi. О́rt sóndirýshiler kelip jetkenshe ishtegi adam tunshyǵyp ólip ketýi múmkin. Al terezeden túsý úshin saty kerek. Tap qazir satyny qaıdan ǵana taba qoıarsyń?! Sábıtjan №16-páterdiń turǵyny J.Omarovadan balta surady. Sasqalaqtaǵanda balta tabyla qoıýshy ma edi. Áıteýir bir kezde balta da tabyldy-aý. Sábıtjan men Beksultan ekeýlep temir esikti buzyp kirýge kiristi. Temirdiń aty qashan da temir. Ony buzý ońaı bola qoıǵan joq. Degenmen ekeýlegen soń qoıa ma, esik bir kezde ashyldy-aý, áıteýir.
Esik ashylǵanda betterin burq etken ystyq jalyn sharpydy. Balkonda ot lapyldap tur. Eki polıseı qoıý tútin ishinen páterde adam bar ma, joq pa dep, ári-beri kezip izdestire bastady. Osy kezde páterdiń túpki bólmesinen yńyrsyǵan adam daýysy estildi.
Ekeýi túpki bólmege umtyldy. О́rship alǵan jalyn qyzýy kúıdirip barady. О́z ómirlerine qaýip tónip turǵanyna qaramastan, olar ilgeri umtyla berdi.
Túpki bólmedegiler ekeý eken. 1980 jyly týǵan Maksım Osınsev pen 1985 jyly týǵan Sergeı Apolskıı tútinge ýlanyp qalypty. Bylq-sylq etken ekeýin syrtqa arqalap shyqty. Olar tez arada krımınaldy polısııa bóliminiń bastyǵy, polısııa maıory Nurjan Amanqulovqa habarlasty. Artynsha shuǵyl kómek kelip, qutqarylǵandarǵa alǵashqy medısınalyq kómek kórsetildi.
О́z ómirlerine qaýip-qater tónse de qıyndyqtardan qaımyqpaǵan qos polıseı tıisti oryndardan laıyqty alǵys aldy. Biraq Beksultan men Sábıtjan erlik jasadyq dep toqmeıilsimeıdi.
– Bizdiń ornymyzdaǵy kez kelgen adam tap osyndaı qadamǵa baratyn edi. Biz erlik jasaǵan joqpyz, – deıdi ekeýi sypaıy ǵana.
Iá, adamdy sulý kórsetetin qasıettiń biri osy qarapaıymdylyq.
Bizge kóbinese osy qarapaıymdylyq jetispeı jatatyny bárimizdi oılandyrýy tıis.
Sabyrbek OLJABAI
Ońtústik Qazaqstan oblysy