Almatydaǵy M.Áýezov atyndaǵy ádebıet jáne óner ınstıtýtynyń abaıtaný jáne ádebıet tarıhy bóliminiń meńgerýshisi, zertteýshi Serikqazy Qorabaı «Ulttyq dombyra kúninde» týǵan mekeni – Jarma aýdanyna qundy jádigerdi tartý etti.
Ǵalym aýdandyq Mádenıet úıine qazaqtyń kórnekti aıtysker aqyny, ólketanýshy, shejireshi, jýrnalıst Qalıhan Altynbaev talaı aıtysta qolyna ustaǵan dombyrany tapsyrdy.
«О́skemendegi Jambyl atyndaǵy mektep-ınternatty 1974 jyly bitirgen kezde burynǵy Shar aýdandyq gazetiniń bas redaktory Mergen Turarov meni qyzmetke shaqyrdy. «Bıyl mektepti bitiredi ekensiń. Bir oryn saǵan daıyn» dedi. Ol kezde tipti KazGÝ-di bitirgen jýrnalısterdiń ózine oryn tabylmaıtyn. Keıin osy aýdandyq gazette jumys istedim. Aýyl-aýyldardy aralap maqala jazdym. Sol kezde Qalıhan Altynbaev aǵamyz Kókpekti aýdandyq «Juldyz» gazetiniń redaktorynyń orynbasary qyzmetin atqardy. Bir kúni ol kisi maǵan: «Jazýyń jaqsy. О́ziń bizdiń jaqtyń balasy ekensiń. Talabyńa nur jaýsyn. Qoldaımyn» dep hat jazypty. Jas balaǵa úlken mártebe ǵoı bul. Sosyn aǵamen únemi hat jazysyp júrdik. Bir haty – bir tarıh edi. Al dombyraǵa kelsek, 1990 jyly jazda Almatyda Áýezov atyndaǵy teatrda Qazaq KSR-niń qurylǵanynyń 70 jyldyǵyna oraı úlken aıtys ótti. Aıtystan soń aqyn bizdiń úıde qonaqta boldy. Sol joly jan serigi – óziniń ustaǵan dombyrasyn maǵan eskertkish retinde syıǵa tartty. Dombyrany 28 jyl úıimde saqtadym. Jarma aýdanynyń 90 jyldyǵy qarsańynda jáne «Ulttyq dombyra kúni» merekesine oraı dara tulǵanyń alaqanynyń taby qalǵan qundy jádigerdi týǵan jerine syıǵa tartýdy jón kórdim. Jastarǵa úlgi bolsyn, aıtyskerdiń jolyn jas urpaqtarǵa bersin degen nıetpen ákeldim», deıdi S.Qorabaı.
Aýdandyq mádenıet jáne tilderdi damytý bóliminiń basshysy Amanjol Daýytov aqyn ustaǵan dombyra jaqynda aýdandyq mýzeıge qoıylatynyn aıtady.
Azamat QASYM,
«Egemen Qazaqstan»
Shyǵys Qazaqstan oblysy,
Jarma aýdany,
Qalbataý aýyly