Semeılikter búgin temirjol vokzalynda «Qazaqstan barysy-2018» saıysynyń júldegerleri Erasyl Qajybaev pen Aıbek Nuǵymarovty qarsy aldy. Semeı qalasynyń ákimi Ermak Sálimov, «Shyǵys» óńirlik áskerı qolbasshylyǵynyń qolbasshysy, general-maıor Nurlan Qashaǵanovtarmen birge qala halqy, balýandardyń týǵan-týystary qushaq-qushaq gúl ákelip, shashý shashty.
Aıta ketý kerek, «Qazaqstan barysy-2018» beldesýiniń fınalynda Erjan Shynkeev «Ásker Barysy» Erasyl Qajybaevty azǵantaı upaı sanymen utyp, bas júlde ıegeri atanǵan edi. Ásker barysy Erasyl Qajybaev kúmis belbeýdiń, Aıbek Nuǵymarov qola belbeýdiń ıegeri boldy. Ekinshi jáne úshinshi orynǵa sáıkesinshe kúmis jáne qola belbeý tapsyryldy. III oryn alǵan balýanǵa 1,8 mln teńge, al onyń bapkerine 900 myń teńge tabystaldy. Al II oryn úshin 5,5 mıllıon teńge, onyń bapkerine 1,8 mln teńge berildi.
– Elbasy Nursultan Nazarbaevtyń tapsyrmasymen «Qazaqstan barysy» osymen 8-ret ótip otyr. Elimiz boıynsha 37 balýan qatyssa, onyń 8-i bizdiń semeılikter bolǵany qýantady, – dedi qala ákimi Ermak Sálimov, – elge úlgi bolatyn osyndaı sportshylarymyzdyń qatary arta bersin! El namysyn kóterip, Aıbektiń jolyn jalǵap júrgen Erasyl baýyrymyzǵa úlken rahmet, tabystar tileımiz. «Ásker barysy» da boldy, qyzmetin abyroımen atqardy, mine bizdiń semeılikter 8 jyl boıy eki altyn, eki kúmis, tórt qola júldege ıe bolyp otyr, bul úlken jetistik. Jeńis qutty bolsyn, halqym!
– «Qazaqstan barysyna» osymen 8-ret qatysyp otyrmyz, – dedi dańqty balýan Aıbek Nuǵymarov, – 8 jyldyń ishinde men tıisinshe júldeli oryndardan kórinip júrdim. Qala basshysy Ermak Sálimovke jáne Erasyl Qajybaev qyzmet etetin «Shyǵys» óńirlik áskerı qolbasshylyǵynyń qolbasshysy, general-maıor Nurlan Qashaǵanovqa osyndaı qoldaýlary úshin úlken rahmet! Jyldan jylǵa «Qazaqstan barysynyń» bedeli artyp keledi. Jastardyń da qyzyǵýshylyǵy bar. Bıyl Erasyldyń osyndaı jetistikke jetýi meni qatty qýantty.
– Bir jyl boıy daıyndalyp keldim, oılaǵanym altyn edi, buıyrǵany osy boldy. Birinshi ret qatysyp turmyn. Altyn alǵansha qatysamyn, jantalasamyn. Almaty qalasyndaǵy SSKA-da áskerı salada qyzmet etemin. Bıyl «Ásker barysyna» qatysyp, sodan joldama aldym. Birinshi beldesýimde Rýslan Ábdirazaqovpen shyqtym. Ol da myqty balýan. О́zim Borodýlıha aýdanynda týdym, Besqaraǵaı aýdanynda óstim, Semeıde oqyp, bilim aldym, – dedi Erasyl Qajybaev.
Erasyl Qajybaev qyzmet etetin «Shyǵys» óńirlik áskerı qolbasshylyǵynyń qolbasshysy, general-maıor Nurlan Qashaǵanov jeńimpazǵa «Shyǵys» óńirlik áskerı qolbasshylyǵynyń medalin tabystady.
Erasyldyń bapkeri Erjan Beısenbaıuly jarystyń joǵary deńgeıde ótkenin aıtyp, úshinshi beldesýde qolynan jaraqat almaǵanda altynnan úmitti ekenin jetkizdi.
Raýshan NUǴMANBEKOVA
Sýretter avtordiki.
SEMEI