Búgin S.Seıfýllın atyndaǵy Qazaq agrotehnıkalyq ýnıversıtetinde «Qazaqstan fermerler odaǵy» Respýblıkalyq qoǵamdyq birlestigi ókilderimen birlesip Agroónerkásiptik keshendi sıfrlandyrý maqsatynda semınar-keńes ótkizdi.
Is-sharaǵa «S.Seıfýllın atyndaǵy QazATÝ» AQ Basqarma tóraǵasy Kúrishbaev A.Q., Qazaqstan fermerler odaǵynyń prezıdenti A.K.Darynov, ýnıversıtet mamandary, AgroSmart kompanııasynyń ókilderi men ózge de 70-ten astam Qazaqstandyq sharýashylyqtar qatysty.
Ýnıversıtet rektory Aqylbek Kúrishbaev óz sózinde bilim ordasynyń jetistikteri týraly qysqasha baıandap, ýnıversıtettiń ǵalymdary aýyl sharýashylyǵyn sıfrlandyrý salasynda erekshe tájirıbe jınaqtaǵandyǵyn atap ótti. Sondaı-aq, bıylǵy jyldyń basynda ýnıversıtet Aýyl sharýashylyǵy mınıstrligi tarapynan agroónerkásiptik keshendi sıfrlandyrýdyń ǵylymı-ádistemelik ortalyǵy retinde qurylǵanyn atap kórsetti. Aýyl sharýashylyǵy mınıstrliginiń sıfrlaý keńsesi ýnıversıtettiń GAJ tehnologııasy ortalyǵyna ornalastyrylǵan dedi. Sonymen qatar, sońǵy jyldary ýnıversıtetten bilim alyp shyqqan jas mamandardyń bilim deńgeıi kóńil qýantarlyq jáne olar sońǵy úlgidegi aýylsharýashylyǵy tehnologııasymen jumys jasaýǵa daıyn ekendigin basa aıtty.
Ýnıversıtet prorektory Qaırat Aıtýǵanov Aqmola, Qaraǵandy, Qostanaı jáne Soltústik Qazaqstan oblystaryndaǵy 9 pılottyq sharýashylyqtardy sıfrlandyrý jobasy qalaı iske asyrylǵandyǵy týraly aıta kele bul múmkindik kez kelgen fermerdiń sharýashylyǵynda bolady dedi. Aýyl sharýashylyǵy sandyq úlgige ótpeıinshe sharýa alǵa jyljý múmkin bolmaıdy dep atap kórsetti.
Aýyl sharýashylyǵy mınıstrliginiń Jer qatynastary jáne jer resýrstaryn basqarý bóliminiń bastyǵy Janar Qarjanova jer komıssııasynyń jumysy týraly egjeı-tegjeıli aıta kele jerdi reformalaý jáne jer quqyǵy týraly suraqtarǵa jaýap berdi.
Taraptar agroónerkásip keshenin sıfrlandyrý salasyndaǵy qazirgi jaǵdaı men ózekti jumys týraly óz pikirlerin bildirdi. Semınar nátıjesi boıynsha jemisti pikirtalas ótkizildi, qatysýshylarǵa qoıylǵan suraqtarǵa tolyqqandy jaýap bere otyryp týyndaıtyn máselelerdi jeke-jeke emes birlesip sheshý kerektigi týraly kelisimder jasaldy. Sebebi aýyl sharýashylyǵy asa aýqymdy sala bolǵandyqtan onymen jalǵyz betpe-bet kelý nátıjesiz. Fermerler óz kezeginde QazATÝ árqashan basqa agrarlyq saladaǵy bilim ordalaryna qaraǵanda oq boıy ekendigin aıtyp, ózderiniń de ýnıversıtet bazasynda bilimderin jetildirýdiń múmkindikterin qarastyrýdy surady. Sebebi bitirýshiler aýylsharýashylyq kásiporyndaryna qajetti mamandar, agronomdarǵa kúrdeli fıtosanıtarııalyq jaǵdaıǵa baılanysty úlken qajettilik týyndap otyrǵandyǵyn aıtyp otyr.
Semınar barysynda ushqyshsyz áýe kemesiniń jumysy kórsetildi jáne agroınjenerııanyń ǵylymı eksperımentaldy alańy tanystyryldy.
Taraptar aǵymdaǵy jaǵdaıdy jáne aýyl sharýashylyǵy sıfrlandyrý salasyndaǵy naqty jumysy týraly pikirlerimen bólisip, óz ara yntymaqtastyq týraly kelisim jasady.