Astana qalasynda Qyzylorda oblysynyń ákimdigi men EýrazEO Parlamentaralyq Assambleıasy janyndaǵy ýnıversıtet arasynda áriptestik týraly memorandýmǵa qol qoıý rásimi ótti.
Kezdesý aıasynda Qyzylorda oblysynyń ákimi Qyrymbek Kósherbaev aımaqta joǵary suranysqa ıe mamandyqtar boıynsha stýdentterdi oqytyp, jumyspen qamtý boıynsha atqarylyp jatqan jumystar týraly aıtty.
«Ulttyq biryńǵaı testileýdiń ortasha bally boıynsha bizdiń oblysymyz qazir úzdik 5 aımaqtyń qatarynda, al 5 jyl buryn sońǵy 16-shy orynda bolatyn. Reseıdiń jetekshi tehnıkalyq ýnıversıtetterimen tyǵyz baılanys ornatýdyń arqasynda búgingi kúni 452 mektep bitirýshimiz Máskeý jáne Sankt-Peterbýrg qalalarda úzik joǵary oqý oryndarynda bilim alýda. Bıyl stýdentterdiń alǵashqy legi dıplom alady, olardyń jumysqa ornalasý máselesin biz aldyn-ala pysyqtap jatyrmyz», - dedi oblys basshysy.
EýrazEO Parlamentaralyq Assambleıasy janyndaǵy ýnıversıtet quramynda 3 ınstıtýt, 4 fakýltet pen 17 kafedra bar. Munda «Bıznes-ınformatıka», «Iýrısprýdensııa», «Servıs», «Týrızm», «Ekonomıka», «Menedjment», «Keden isi», «Jarnama jáne jurtshylyqpen baılanys», «Konflıktologııa», «Dızaın», «Qoldanbaly kórkemóner jáne ulttyq kásipshilik», «Saýda isi», «Psıhologııa» sııaqty mamandyqtar oqytylady.
«Qyzylorda oblysy alǵashqylardyń biri bolyp kadrlardy daıyndaý salasynda áriptestik ornatý boıynsha usynysymyzǵa keliskenine óte qýanyshtymyz. Qazirgi tańda mamandardy daıarlaý máselesinde jeke kózqaras tıimdi. Bıyl ýnıversıtetimizde qosylǵan jańa baǵyttarynyń biri – bıznes-ınformatıka. Bul mamandyq aıasynda stýdentter sıfrlyq ekonomıka damyǵan zamanda ózekti salalarynyń biri – blokcheın men krıptovalıýtalardy zertteıtin bolady», - dedi ýnıversıtet rektory Erlan Ysqaqov.
Baqtııar TAIJAN,
«Egemen Qazaqstan»
Qyzylorda oblysy