El ekonomıkasynyń ary qaraıǵy damýyn jáne ońtústik astanany zamanaýı úlgide damytýdyń tetikterin qamtamasyz etý baǵytynda qolǵa alynǵan «Almatyny damytýdyń 50 draıver-jobasy» aıasynda qazirgi kezde kóptegen jobalar júzege asyp keledi. Osy oraıda aǵymdaǵy jyly qorshaǵan ortaǵa ekologııalyq júktemeni tómendetý maqsatyndaǵy ıgi bastamalardy atap ótýge bolady. Bul joba ınnovasııalyq tehnologııalardy tartýmen qatar jańa jumys oryndaryn ashýǵa, qalanyń qorshaǵan ortasyna túsetin ekologııalyq júktemeni tómendetý múmkindigin beredi.
Osy baǵytta megapolıs basshysy Baýyrjan Baıbek qoqys suryptaıtyn jańa keshenniń, gazben júretin avtobýstarǵa arnalyp salynyp jatqan kommýnaldy parktiń jáne elektroavtobýstardyń sońǵy túrlerin shyǵaratyn zaýyt qurylystarynyń jumys barysymen tanysty.
Almaty qalasy ákiminiń baspasóz qyzmetiniń málimetteri boıynsha, qazirgi kezde «FalconEuroBus» qazaq-nemis kompanııasy tarapynan elektroavtobýstardyń úshinshi túrin shyǵaratyn zaýyt qurylystary júrgizilip, jalpy alańy 7 myń sharshy metrdi quraıtyn jınaý-syrlaý sehynyń, jabyq turaq pen qoıma bólmelerdiń qurylystary aıaqtalýǵa jaqyn. Jobadaǵy jeke ınvestısııa kólemi 15 mlrd. teńgeni quraıdy.
Jumys sapary barysynda qala ákimi sonymen qatar jyldyq qýaty 550 myń tonna turmystyq qatty qaldyqtar men qoqys óńdeıtin ári suryptaıtyn jańa keshen qurylysymen de tanysty. Jýyq arada ıtalıandyq jabdyqtar iske qosylyp, jóndeý jumystary aıaqtalatyn bolady. Munda jumystyń barlyǵy keshendi basqarý júıesi arqyly atqarylady, al polıgonǵa qaýpi az jáne bıobuzylǵysh zattar jiberiledi de, keıinnen qaıta óńdeýge alynady.
Gazben jumys isteıtin 200 jolaýshy avtobýsyna qyzmet kórsetetin jańa kommýnaldy avtobýs parkiniń qurylysy da qarqyndy iske asýda.
«Almatyny damytýdyń 50 draıver-jobasy» jobasy aıasynda Al 2021 jylǵa qaraı Almaty aýmaǵyndaǵy tórt myń jeke úı gazdandyrylady. Ekologııalyq qoǵamdyq kólikter iske qosylady. Qazirdiń ózinde avtoparkterdiń 60%-y gazben júretin avtobýstar men trolleıbýstarmen qamtamasyz etilgen. Avtobýs parkteri 30%-ǵa jańartylyp, metronyń 2 jańa beketi salynýda. Búginde 12 elektrojabdyqtaý stansııasy jumys istese bul kórsetkish 2019 jyldyń sońyna qaraı 47-ge jetkizý josparlanyp otyr.
Elvıra Serikqyzy,
«Egemen Qazaqstan»
ALMATY