Brazılııa Meksıkany jeńip, Anglııa Kolýmbııany penaltıden utty. Sonymen shırek fınalǵa shyqqan barlyq komandalardyń esimi belgili. 6 shilde kúni bastalatyn bul oıyndarda kimniń qarymy kúshti bolýy múmkin. Saraptap kórelik.
Álem chempıonaty bastalmas buryn 6 favorıttiń aty ataldy. Eýropadan tórteý: Germanııa, Ispanııa, Fransııa, Portýgalııa. Al qalǵan eki favorıt Latyn Amerıkasynan: Brazılııa men Argentına bolatyn. Endi mine, bul tizimde bolǵan komandalardan 2 ujym ǵana qalyp otyr. Fransııa men Brazılııa. Shırek fınalǵa shyqqandardyń ishinen endi biz kimderdiń bási joǵary bolýy múmkin ekendigine toqtalsaq. Árıne tizimge taǵy 2 komandany qossaq bolady. Alaıda Belgııa men Anglııanyń joly ekige bólingen. Bir toptan shyqqan qarsylastar fınalda ǵana kezdese alady. Al toptan ekinshi oryn alyp, álsizder jaǵyna shyǵyp ketken aǵylshyndardyń joly boldy. Kolýmbııany áýpirimdep júrip jeńgennen soń, olardy Shvesııa kútip tur. Aıtpaqshy álem chempıonattarynyń tarıhynda Anglııa úsh márte oıyn sońynan keıingi penaltıden jeńilgen eken. Osy joly Garet Saýtgeıt komandasy osy bir jaǵymsyz jaıdy attap ótti. Bul neniń belgisi ekenin ázirge eshkim bilmeıdi.
Osy oıynnan soń mamandar Anglııany bıyl chempıon bolýy múmkin degen quramanyń qataryna qosty. Rasymen de, Tumandy Albıonnyń komandasy bıyl talantty jastardan quraldy. Endi olar skandınavııalyq quramany aınalyp ótse boldy, jartylaı fınalǵa shyǵady. Al Shvesııa Anglııanyń únemi jeńip júrgen komandasy desek artyq emes.
Ýrýgvaı – Fransııa arasyndaǵy teketireste anyq lıder eýropalyqtar ekeni túsinikti. Degenmen toptyq kezeńde qaqpasyna gol jibermegen Ýrýgvaı qorǵanysymen tańǵaldyrýda. Portýgalııa qorǵaýshysy Pepe soqqan jalǵyz gol ýrýgvaılyq qaqpashy Fernando Mýslerany óz amplýasyndaǵylardan bir bas joǵary shyǵaryp tur. Chempıonattyń úzdik qaqpashysy, ıaǵnı altyn qolǵapty da osy qaqpashy alýy múmkin. Ol úshin Ýrýgvaı kem degende jartylaı fınalǵa shyǵýy tıis. Biraq býkmekerlik keńseler Fransııa jartylaı fınalǵa joldama alady dep senimdi sóılep otyr. Olar sırek qatelesetinin eskere otyraıyq.
Brazılııa-Belgııa jubynda naqty kóshbasshy joq. Biraq oıyn aldyndaǵy sandar men faktiler «selesao» komandasyna basymdyq berip tur. Sebebi Brazılııa Belgııaǵa qaraǵanda, az gol jiberip, 1/8 fınalda asa qatty qıyndyq kóre qoıǵan joq. Álemniń 5 dúrkin chempıony Meksıkany 2:0 esebimen aıqyn jeńdi. Jalpy, 1/8 fınalda eshqandaı komanda qarsylasyn 2 dop aıyrmasymen uta alǵan joq. Al Belgııa Japonııadan 2 dop aıyrmasymen utylyp jatyp, sońǵy sekýndtarda ǵana jeńisti julyp áketti. Biraq Roberto Martınestiń komandasy kún saıyn qarqynǵa qarqyn qosyp kele jatqandaı. Sondyqtan da Belgııa men Brazılııanyń kelesi kezeńge ótý paıyzy 50-50 der edik.
Reseı – Horvatııa juby. Horvatııanyń kelesi kezeńge ótetin múmkindigi mol ekendigi túsinikti. Shaqpaq jeıdeli komanda álemniń úzdik klýbtarynda oınaıtyn fýtbolshylarmen jasaqtalǵan. 11 oıynshysynyń deńgeıi birkelki. Al qaqpashysy Danıel Sýbashıch 3 penaltı qaıtaryp, kórermen kózaıymyna aınaldy. Biraq jarys Reseı jerinde ótip jatqandyqtan Horvatııaǵa bul oıyn ońaı soqpaıtyny anyq. Onyń ústine ataqty Ispanııany jarystan shyǵaryp jibergen reseılikter endi óz kúshterine senimdi kúıde horvattardy da tyqsyryp tastaımyz dep bilek sybanyp otyr. Bul juptyń jeńimpazy Anglııa-Shvesııa teketiresiniń jeńimpazymen kezdesedi.
Sonymen shırek fınaldyń oıyndary 6-7 shilde kúnderi oınalady.
Ermuhamed Máýlen,
«Egemen Qazaqstan»