Batys Qazaqstan oblysy Zelenov aýdanynyń ortalyǵynda aýdandyq tarıhı-ólketaný mýzeıi ashyldy. О́ndiristi óńir, úlken aýdan ortalyǵynda buǵan deıin el men jer tarıhyn jınaqtaǵan mýzeı úıi bolmaǵan eken. Astananyń 20 jyldyǵyna oraılas kelgen oqıǵa aýyl turǵyndarynyń esinde qalatyn boldy.
Eki qabatty eńseli ǵımaratta ornalasqan jańa mýzeı Elbasy N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń «Týǵan jer» baǵdarlamasy aıasynda ashylyp otyr. Mýzeıde ázirge 300-ge jýyq jádiger qoıylǵan. Biraq aýyl turǵyndarynyń ystyq yqylasyna qaraǵanda, jádiger sany eselep artyp, týǵan jerdiń tarıhy tez túgendeletin túri bar sııaqty. Tipti osy mýzeıdiń ashylýyna da aýyl kásipkerleri Baqyt Netalıeva, Baýyrjan Sakpıreev, Saıra О́mirbaeva syndy aýyldastar qarjylaı úles qosqan.
Mýzeıde Zelenov aýdanynyń ótken tarıhy, damý joly, óńirden shyqqan tulǵalar týraly tolyqqandy málimet alýǵa bolady. Ǵımarattyń tómengi qabatynda ornalasqan birinshi zalda – Qazaqstan tarıhy, ejelgi zamannan búgingi kúnge deıingi ult tarıhynyń damý kezeńderi kórinis tapqan. Ekinshi zal – ólke tabıǵatyna arnalǵan. Úshinshi zal – óńirdiń negizgi sharýashylyǵy – eginge, astyqty alqap tynysyna arnalǵan. Tórtinshi zalda geologııalyq materıaldar, óńirde kezdesetin tabıǵı jynys úlgileri qoıylǵan.
- Mýzeı ǵımaratynyń ekinshi qabatynda kórme zaly jumys isteıdi. Munda aýdan qolóner sheberleriniń, sýretshi, músinshilerdiń jumystary qoıylady. Osy jerdegi konferens-zalda túrli taqyryptaǵy ǵylymı-praktıkalyq konferensııalar, semınar-keńester ótkizý josparlanǵan. Biz mýzeıdi ǵylymı-shyǵarmashylyq ortalyqqa aınaldyrǵymyz keledi, - deıdi mýzeı dırektory Nurjan Dúzbatyr. Mýzeı ǵımaratynyń bir buryshynda Assambleıa kabıneti de jumys istemek. Aýdanda shoǵyrlanǵan 40-tan astam ult ókilderi osy zalda bas qosyp, salt-dástúr, mádenıet pen óner, t.b. baǵytta jumystar júrgizýge múmkindik almaq.
Mýzeıdiń alǵashqy jumys kúni munda «О́lketaný: ótkenniń izi – búginge baǵdar» atty ǵylymı konferensııa ótti. Bul jıynǵa ólketanýshy ardager Jaısań Aqbaı, Batys Qazaqstan oblystyq tarıh jáne arheologııa ortalyǵynyń dırektory, tarıh ǵylymdarynyń doktory Murat Sydyqov, alashtanýshy, tarıh ǵylymdarynyń kandıdaty Dámetken Súleımenova, batys Qazaqstan oblystyq máslıhatynyń depýtaty, mesenat Aqserik Áıtimov, tarıhshy ǵalym Jańabek Jaqsyǵalıev taǵy basqalary qatysty. Eńbek ardagerleri M.Jubandyqov, F.Iаfarov, aýdandyq máslıhat hatshysy R.Ismaǵulov sóz sóılep, mýzeıge syıǵa kitaptar tartý etti.
Qazbek QUTTYMURATULY «Egemen Qazaqstan»
Sýretterdi túsirgen Túgelbaı BISEN
Batys Qazaqstan