Almaty oblysy Narynqol aýdanynyń aýmaǵyna aıaq basqan adamnyń nazaryn alystan munartqan aqbas shyńdy taý silemi eriksiz ózine tartar edi. Qazaq tanymynda Táńirtaý ataýyna ıe bolǵan álemdegi eń bıik shyńnyń biri –Hantáńiri osy.
Teńiz deńgeıinen 7010 metr bıiktikte turǵan shyń elimizdiń ońtústik-shyǵys shekarasyndaǵy berik bosaǵa ǵana emes, jahannyń qyzý qandy týrısterin qyzyqtyrǵan áıgili týrıstik nysan retinde de tanymal. Ortalyq Tıan-Shan taý jotasynyń shyǵysy bóligindegi aspanmen tildesken osy muzarttyń eń bıik núktesine jetý adamzattyń aýzymen qus tistegen alpınısteriniń armany bolýdan aınyǵan emes. Jaraǵyn saılaǵan jaýjúrek jandardyń toby jyl saıyn Hantáńirin baǵyndyrýǵa kelip-ketip jatady. Bul týraly shytyrman oqıǵaly shyǵarma nemese kórkem kıno túsirýge bolar...
Kúni keshe Hantáńiri bıiginen Qazaqstan týyn jelbiretýge bel býǵan taǵy bir ekspedısııa jolǵa shyqty. Almaty oblysynda júzege asyp jatqan «Qasıetti Qazaqstan» baǵdarlamasynyń sheńberinde jasaqtalǵan toptyń quramynda belgili akter, týrıstik ekskýrsııalar uıymdastyrýmen aty shyqqan «Sampit» kompanııasynyń ókili Ánýar Nurpeıisov, operator Aleksandr Kýznesov, teatr jáne kıno ártisi, «Alpınıada» taý klýbyna qatysýshy Aısulý Ázimbaeva jáne jobany júzege asyrýǵa jaýapty «Jetisý geografııalyq qaýymdastyǵynyń» tóraǵasy Ánýar Demegenov bar. - Almaty oblysynyń týrıstik áleýeti zor. Jetisý - tamasha flora jáne faýnasymen qyzyqtyratyn óńirlerdiń biri. Bizde shól, taýlar men ózender kóp. «Jetisý geografııalyq qaýymdastyǵy» óz qyzmeti sheńberinde jobalar men ekspedısııalarǵa qatysý úshin entýzıastar men zertteýshilerdi tartady. Qoǵamnyń alǵashqy jobasy 20 myń metr bıiktiktegi Jetisý shyńdaryn baǵyndyrý bolyp otyr, – deıdi bul jaıynda Almaty oblystyq ishki saıasat basqarmasynyń basshysy Rýstam Alpysbaev.
Demek, bul ekspedısııanyń jóni bólek bolyp tur. Tórteý túgeldengen top taý basyna qyzyq úshin órmelep barmaıdy. Ataý-soıy «medıa-ekspedısııa» dep aıshyqtalǵan jobanyń maqsaty Jetisý óńiridegi týrızmniń órkendeýine ólsheýsiz úles qosyp, dúnıejúzine Qazaqstannyń tumsa tabıǵaty týraly dáıekti derekter usyný bolyp otyr. Segizinshi tamyzǵa deıin jalǵasatyn týrıstik týr aıasynda áýesqoı alpınıster Hantáńiriniń eń bıik shyńyna kóterilýdi josparlapty.
Jalpy, «Jetisý geografııalyq qaýymdastyǵy» uıymy otandyq týrızm men elimizdiń kıeli jerleriniń kartasy boıynsha tanymdyq týrlar uıymdastarýǵa bel sheshe kirisip otyr. Buıyrsa, Hantáńirine attanǵan medıa-ekspedısııa tobynan bólek, áıgili Shyńǵyshannyń qolbasshysy bolǵan Muqalı noıannyń izimin halyqaralyq ekspedısııa jolǵa shyqpaqshy. «Rýhanı jańǵyrý» baǵdarlamasy aıasynda kóne tarıh kóshimen júrip ótetin sapardyń negizgi bóligi Qytaı eliniń aýmaǵynda ótpek.
Qalmahanbet MUQAMETQALI, «Egemen Qazaqstan» Almaty oblysy