Shilińgir shildede oblys ortalyǵynda Shalqar aýdanynyń kúnderi ótkizildi. Osy bir shyraıly sharalar kezinde Qazaqstan Respýblıkasynyń Tuńǵysh Prezıdenti atyndaǵy ortalyq demalys saıabaǵynda jańasha úlgide tigilgen kıiz úıge nazarymyz aýa berdi.
Shalqar aýdandyq bilim bóliminiń bas mamany Dıdara Aqmalaıdyń aıtýynsha, bul ádettegi aǵash úılerdiń biri emes, «jasyl ekonomıka» men «jasyl álem» standarttaryna sáıkes qurastyrylǵan ınnovasııalyq kıiz úı bolyp shyqty. Onyń buǵan deıingi kóz úırengen kıiz úılerden artyqshylyǵy men ózgesheligi qandaı?
– Zamanaýı úlgide jabdyqtalǵan ári túrli tústermen kómkerilgen IT aǵash úıdiń ishine fızıka páni muǵalimderi men oqýshylardyń birlesip jasaǵan týyndylary qoıyldy. Mundaǵy jergilikti jańashyldardyń qolynan shyqqan kún men jeldiń qýatyn paıdalaný arqyly jumys isteıtin qondyrǵylar men aspaptar eshkimdi enjar qaldyra almaıdy. Sonymen birge ashy sýdy tushytý quraldary da kópshiliktiń qyzyǵýshylyǵyn týǵyzyp otyr, – deıdi Shalqar qalasyndaǵy №7 orta mekteptiń dırektory Gúlsaıran Ybyraeva.
Rasynda da qara dúrsin emes, tıisti ǵylymı-zertteýler men jumystardyń nátıjesinde týyndaǵan ómirsheń tehnıkalyq quraldardy serııalyq óndiriske qoısa ózin-ózi tolyǵymen aqtar edi-aý degen oı kóldeneńdeı beredi. Dál osy tusta ózimiz tikeleı kýá bolǵan jańashyldyqtyń bir kórinisi týraly aıta ketsek, velosıped tebý arqyly uıaly telefonnyń qýatyn toltyrýǵa bolady eken. Mundaı mysaldar jetkilikti. Osyndaıda eriksiz jaraısyńdar shalqarlyq jas órender, degim keledi.
Temir QUSAIYN, «Egemen Qazaqstan»
Aqtóbe oblysy, Shalqar aýdany