Májilis depýtattary, «Nur Otan» partııasy fraksııasynyń músheleri Abaı Tasbolatov pen Olga Shıshıgına Almatyǵa jumys sapary barysynda Oqýshylar saraıynda partııa jobasy aıasynda uıymdastyrylǵan IT synypty aralap kórdi.
Synypta 30 bala eki aıdan beri robot tehnıkasy, 3D modeldeý jáne dızaın boıynsha daıyndyqtan ótýde. Balalar oqý barysynda úırengen baǵdarlamalaý jobalary boıynsha keıin óz betinshe modelderdi qurastyra alady. Osy rette Májilis depýtaty A.Tasbolatov balalardyń bul baǵdarlamalarǵa yntalylyǵyna qýanyshty ekenin jetkizdi. «Respýblıka boıynsha 1000 synypta jarty mıllıonǵa jýyq oqýshy jańa baǵyttaǵy sapaly bilim alýda. Bul bizdiń keleshekte suranysy joǵary mamandyqtar boıynsha naryqty sapaly mamandarmen qamtamasyz ete alamyz degen sóz», – dedi ol.
Munda 12-17 jas aralyǵyndaǵy oqýshylar ózderiniń kásipkerlik jáne shyǵarmashylyq oılaý daǵdylaryn damytýda. Olar qarjylyq saýattylyqtyń negizderin úırenýge, kóshbasshylyq qasıetterdi anyqtaýǵa, sondaı-aq ıdeıalardy is júzinde iske asyrý tájirıbesin ıgerýge kómektesedi.
***
Májilistiń Agrarlyq máseleler komıtetiniń tóraǵasy Saparhan Omarov pen Májilis depýtaty Fahrıddın Qarataev Túrkistan oblysyndaǵy óndiris oshaqtarynyń jumysymen tanysyp, eńbek ujymdarymen kezdesýler ótkizdi.
S.Omarov Kentaý qalasyndaǵy ındýstrııalyq aımaqta ornalasqan «Iýg-Elektroprıvod» JShS tynys-tirshiligimen tanysty. Eńbek ujymymen kezdesý barysynda komıtet tóraǵasy «Prezıdenttiń bes áleýmettik bastamasy», sondaı-aq memlekettik baǵdarlamalardy júzege asyrýǵa yqpal etetin zańnamalyq normalar týraly áńgimeledi. Al Fahrıddın Qarataev Túlkibas aýdanyna kelip, «Kóktal» sharýa qojalyǵynyń jumysymen tanysty. 2004 jyly qurylǵan sharýa qojalyǵy búgingi tańda jemis-jıdek ósirýmen jáne saqtaýmen aınalysyp, onda 30 adam turaqty jumys jasaıdy. Al maýsymdyq kezeńde qojalyq 220 adamdy jumyspen qamtıdy.
***
Májilistiń Ekologııa máseleleri jáne tabıǵatty paıdalaný komıtetiniń tóraǵasy Gleb Shegelskıı men Májilis depýtattary Quralaı Qaraken, Sergeı Sımonov, Mıhaıl Chırkov, Danııa Espaeva Aqtóbe oblysyndaǵy Rodnıkovka aýylynyń turǵyndarymen kezdesti.
Mártók aýdanyna qarasty okrýgte 1385 adam turady, olardyń jartysyna jýyǵy ekonomıkalyq belsendi azamattar. Olar depýtattarmen kezdesý barysynda birqatar problema kóterdi. Onyń biri – sý jetispeýshiligi. Aýyldyq okrýgtiń ortalyqtandyrylǵan sý jáne gaz jelisimen qamtamasyz etilgenine qaramastan, sý máselesi turǵyndar úshin ózektiligin joımaı tur. Bul týraly aýdan ákimdiginiń ókilderi máseleniń jobalyq-smetalyq qujattamasyn ázirleýge 9 mln teńge bólingenin aıtyp, jyl sońyna deıin bıýdjettik ótinim berilip, qarajat bólingen kezde sheshiletinin jetkizdi. Budan basqa, bıyl Rodnıkovka aýylynda «Aımaqtardy damytý» baǵdarlamasy boıynsha kóshelerdi jaryqtandyrýǵa 1,4 mln teńge bólinbek.
О́z kezeginde, depýtat G.Shegelskıı aımaqtarǵa sapar aıasynda depýtattyq toptyń Batys Qazaqstan men Aqtóbe oblysynda bolǵanyn, kezdesýler barysynda «Elbasynyń bes áleýmettik bastamasy» qalaı júzege asyrylǵanyn aıtyp, halyqtyń muń-muqtajyn tyńdap, olardyń oń sheshimin taýyp jatqanyna nazar aýdardy.
Daıyndaǵan Venera TÚGELBAI,
«Egemen Qazaqstan»