Astana qalalyq ákimdiginde múmkindigi shekteýli adamdar úshin elordadaǵy áleýmettik ınfraqurylym nysandarynyń qoljetimdiligi máselesin talqylaýǵa baılanysty keńes ótti. Oǵan «Nur Otan» partııasy Tóraǵasynyń birinshi orynbasary Máýlen Áshimbaev, Astana qalasynyń ákimi, partııanyń Astana qalalyq fılıalynyń tóraǵasy Áset Isekeshev, «Nur Otan» partııasynyń hatshysy Tamara Dúısenova, múmkindigi shekteýli jandarǵa qamqorlyq kórsetetin birqatar úkimettik emes uıymdar qatysty.
«Nur Otannyń» partııa qyzmetin jańǵyrtý jumystarynyń aıasynda birqatar áleýmettik mańyzdy jobalar qarqyndy júrgizilip, sonyń ishinde múmkindigi shekteýli jandarǵa qolaıly orta qalyptastyrýǵa arnalǵan is-sharalar da turaqty qolǵa alynýda. Desek te, áli qamtylmaı jatqan máseleler de jetkilikti. «Nur Otan» partııasynyń bastamasymen osy máselemen aınalysatyn úkimettik emes uıym ókilderi Astana qalasynyń ákimdiginde bas qosyp, naqty usynystary men tilekterin jetkizdi.
«Nur Otan» partııasy Tóraǵasynyń birinshi orynbasary Máýlen Áshimbaev áleýmettik máselelerdi ońtaıly sheshý Elbasy el aldyna qoıǵan damyǵan 30 eldiń qataryna ený mindetindegi negizgi talaptardyń biri ekenin jetkizdi. «Búginde múgedek jandardy qoǵamdyq uıymdar, úkimettik emes uıymdar men qoǵam belsendileri tarapynan qoldaý jaqsy úrdiske aınaldy. Osy oraıda «Nur Otan» partııasy qyzmetin jańǵyrtý aıasynda múmkindigi shekteýli jandardyń ómir súrý sapasyn jaqsartýǵa baǵyttalǵan «Kedergisiz keleshek» partııalyq jobasyn odan ári jandandyryp, tıimdiligin arttyrýdy qolǵa aldyq. Sol arqyly erekshe kútimdi qajet etetin azamattarǵa naqty kómek berýge basymdyq berip otyrmyz. Jobanyń negizgi mindeti – múmkindigi shekteýli qazaqstandyqtardyń ómir sapasyn jaqsartý. Biz qazirgi ýaqytta jobany qajet etetin, úkimet, partııa jáne qoǵam tarapynan kómek kútetin jandarǵa shyn máninde kómegin tıgizýi úshin qaıtadan qarastyryp jatyrmyz. Bolashaqta jobany kúsheıtip, mańyzyn arttyra túspekpiz», deı kele, partııa Tóraǵasynyń birinshi orynbasary jobanyń kelesi kezeńderindegi tórt basymdyqty atap kórsetti. Onyń alǵashqysy, múmkindigi shekteýli jandarǵa kedergisiz orta jasaqtaý bolsa, ekinshisi, balalardyń ınklıýzıvti bilim alýyna kómektesý bolmaq. Úshinshiden, olardyń jumysqa ornalasýyna jaǵdaı jasap, jaǵdaıyn jaqsartýǵa múmkindik berý kerek. Sońǵy basymdyq osy sala boıynsha el zańnamasyn jetildirýge beriledi.
О́z kezeginde qala ákimi Á.Isekeshev bul baǵytta atqarylyp jatqan jumystardy baıandap ótti. Onyń aıtýynsha, búgingi tańda Astana qalasynda 23 myńnan astam múmkindigi shekteýli adam tirkelgen eken. Olardyń júrip-turýyna, ǵımarattarǵa kirip-shyǵýǵa yńǵaıly jaǵdaı jasaý maqsatynda kóptegen saýda jáne áleýmettik nysandar pasporttaýdan ótken. «2012-2016 jyldar aralyǵynda 400 nysan, al 2017 jyly taǵy 705 nysan pasporttaýdan ótti. Osylaısha, búginde qaladaǵy myńnan astam ǵımarattyń 70 paıyzy múmkindigi shekteýli azamattar úshin tolyǵymen qaıta jasaqtaldy.
Jınalysta sóz alǵan «ELAMAN» áleýmettik-ınnovasııalyq jobalar qorynyń tóraǵasy Almaz Erjan múgedekterge jaǵdaı jasaýdyń kemshin tustaryn atady. Onyń aıtýynsha, elordada jańa nysandar salyný barysynda múgedekter máselesi birden eskerilmeıdi. Keıin qarjy shyǵyndalyp, ózgertiledi. Aldyn alyp, qurylystyń jobasy talqylanǵanda múmkindigi shekteýli jandar shaqyrylmaıdy, keńesi alynbaıdy. «Tipti memlekettik mekemelerde múgedekterge arnalǵan dárethana, ǵımaratqa minip-túsýge arnalǵan pandýstar joqtyń qasy. Bul bizdiń quqyǵymyzdyń taptalýy. Memleket basshysy únemi qaıtalaıtyn rýhanı jańǵyrý ıdeıasynyń ózi eń aldymen azamattardyń ony túsinýinen bastalady», – dedi A.Erjan.
Osy baǵytta júrgizilip jatqan jumystar keleshekte múgedekter tarapynan túsken usynystarmen tolyqtyrylyp, partııa jáne ákimdik tarapynan qadaǵalaýǵa alynatyn boldy. Shara qorytyndysy boıynsha birqatar usynystar túsip, osy másele boıynsha jumystardy baqylaý «Nur Otan» partııasynyń hatshysy Tamara Dúısenovaǵa júkteldi.
Venera TÚGELBAI, «Egemen Qazaqstan»