33 jyl boıy jańarmaǵan rekord

Uzyndyqqa sekirýshi Bob Bımon Mehıko­ǵa basty favorıtterdiń biri retin­­de atandy. Sebebi Olımpıada qar­sańynda ózi qatysqan 23 jarystyń 22-sin­de ol jeńimpaz atanǵan edi. Tipten, sol básekelerdiń birinde álemdik rekordty jańartqanyna dúıim jurt kýá. Alaıda bul qatardaǵy kóp týrnırlerdiń biri bolǵandyqtan Halyqaralyq jeńil atletıka federasııasy tarapynan bul kórsetkish resmı túrde tirkelgen joq. 

Mehıko Olımpıadasy Bımon úshin sátsiz bastaldy. Áý basta eki ret jolaqty basyp ketken ol jaǵdaıyn qıyndatyp aldy.  Desek te úshinshi múmkindigin sátti paıdalanyp, 8 metr 19 santımetrlik kórsetkishpen fınalǵa shyqty. Aqtyq synda AQSh sportshysy aıdy aspanǵa shyǵaryp, 8 metr 90 santımetrge bir-aq sekirdi. Stadıon toly jankúıerler oryndarynan tik turyp, kedeıshilik pen joqshylyqtyń taýqymetin kóp tartqan sańlaqqa qoshemet kórsetti. Al kózderi sharasynan shyqqan tóreshiler jańa rekord qoıylǵanyn jarııalaýǵa asyqpady. Bul kórsetkishti esepke almaýdyń jolyn izdegen olar ár nársege kılikti. Biraq erejege qaıshy keletin túk tappaǵannan soń araǵa jarty saǵat salyp, amerıkalyq Ralf Boston men KSRO-nyń myqtysy Igor Ter-Ovanesıannyń álemdik rekordyn 22 jastaǵy Bob Bımon baqandaı 55 santımetrge jańartqanyn jalpaq jurtqa jarııa etti. Sol kezde chempıonnyń dál qasynda turǵan Ter-Ovanesıannyń «Myna jigittiń nátıjesiniń qasynda bizdiki kóshede júrgen bir balanyń jaı ermegi sekildi bolyp qaldy ǵoı» dep bas shaıqaǵany bar.   

Keıinnen Bımon talaı baıraqty básekelerge qatysqanymen Mehıkodaǵy kórsetkishine mańaılaı da alǵan joq. Oǵan sebep, aıaq sińirleriniń sozylýy. Bul rekord murty buzylmaǵan kúıi 33 jyl boıy turdy. Tek 1991 jyly Tokıoda ótken álem chempıonatynda bul kórsetkishti AQSh-tyń taǵy bir ataqty jeńil atleti Maıkl Paýell jańartty. Japonııanyń astanasynda ol 8 metr 95 santımetrge sekirgen edi. Sodan beri de shırek ǵasyrdan asa ýaqyt ótti. Nebir dúldúlder qansha jantalasyp, áreket etkenimen Paýeldiń osydan 27 jyl burynǵy rekordyn jańarta almaı júr...

Ǵalym SÚLEIMEN, «Egemen Qazaqstan»