Oblys ortalyǵynda bir myńǵa jýyq kópqabatty turǵyn úı bar. Alaıda olardyń besten birinde páter ıeleri kooperatıvteri (PIK) qurylmaǵandyqtan, jylytý maýsymy qarsańynda alashapqyn bolyp júrý ádetinen áli aryla almaı keledi.
Jeńildikpen jylý eseptegish quraldaryn ornatý memlekettik baǵdarlamasynyń júrgizilip kele jatqanyna úsh jyldan assa da, bar-joǵy 500-deı ǵana qurylǵy ornatylǵan. Tipti jobanyń júzege asyrylýy osy jyldyń qarasha aıyna deıin uzartylǵanyna, saralanǵan tarıftiń qymbattaǵanyna qaramastan, keıbir turǵyndar onyń tıimdiligin, únemdiligin qaperge alar emes.
Egesi joq úılerdiń dálizderi, esik-terezeleri qymtalmaýy sebepti paıdalanatyn jylý mólsheri de, tólemaqysy da sharyqtap ketetini túsinikti. Turǵyn úı qorynyń úshten biriniń ǵana daıyndyq pasportyn alǵandaryna qaraǵanda, PIK jetekshilerine jumystaryn shıratpaı bolmaıdy. Byltyr osyndaı jaýapsyzdyqtar saldarynan jergilikti bıliktiń shuǵyl sharalar qabyldaýyna týra kelgen-di. Oblystyq ákimdiktiń otyrysynda qylyshyn súıretip kele jatqan qysqa ázirlik barysy qaralyp, oblys ákiminiń orynbasary Anton Fedıaevtyń esebi tyńdaldy. Onyń aıtýynsha, Petropavl №2 jylý-elektr ortalyǵy 4 mıllıard teńge bólip, bul qarajatqa alty qazandyq, osynsha qubyr agregaty jóndelgen. №4, 1, 5-shi týrboagregattar aýystyrylyp, nátıjesinde onyń tozý kórsetkishi 89 prosentten 59 prosentke deıin tómendegen. Sonyń arqasynda jylyna 100 myń tonna kómir únemdeletin boldy. Qazir munda bir aıǵa jetetin kómir qory men bir myń tonna mazýt bar. Qazandyqtardyń 90 prosenti ázir degen derek keltirilgenimen, bul jumys Jambyl, Ǵ.Músirepov aýdandarynda tıisti dárejede atqarylmaǵany belgili boldy. Bilim berý, densaýlyq saqtaý, basqa da bıýdjettik mekemelerdiń qysqy jylytý naýqanyna saqadaı-saı ázirligin arnaıy shtab baqylaýda ustaıdy.
О́ńir basshysy Qumar Aqsaqalov turǵyndardy kómirmen qamtamasyz etý, aýdan ortalyqtarynda qazandyqtardy qalpyna keltirý, bıomassamen jylytylatyn peshterdi ornatý máselelerinde sheshimin tappaǵan túıtkildi jaıttardy atap kórsetip, tıisti oryndarǵa naqty tapsyrmalar berdi.
– Ýaqyt naıqalýdy kótermeıdi. О́z mindetterine salǵyrt qaraǵan kásiporyn basshylaryn tıisti ákimshilik jaýapkershilikke tartý qajet, – dedi Qumar Aqsaqalov.
«Petropavl jylý jelileri» JShS-sy josparlanǵan 11,9 shaqyrym jylý jelisiniń 8,8 shaqyrymyn aýystyrǵan. Alaıda, belgilengen sharalardyń kesteden keshiktirilýi alańdatpaı qoımaıdy. Buǵan turǵyndar men PIK-terdiń sylbyrlyǵyn qossaq, jaǵany jaılaýǵa jiberýdiń jóni joq. Ishki jylý júıelerin shaıý jáne qysym arqyly tekserý jumystary 1073 kópqabatty turǵyn úıdiń úshten ekisine ǵana júrgizilgen. Al qysqa ázirlik kýáligi bar bolǵany 100 úıge berilgen.
Energetıkter kúrdeli jáne aǵymdyq qalpyna keltirý jumystaryn 20 qyrkúıekke deıin tolyq aıaqtaýdy josparlap otyrǵandyqtan, tutynýshylar da, PIK-ter de shıraqtyq tanytýlary kerek-aq. Kún saıyn san qubylatyn aýa raıyn boljaý múmkin emes. Qystyń qyr astynda turǵanyn kúzdiń salqyn qabaǵy da anyq ańǵartyp tur.
О́mir ESQALI,
Soltústik Qazaqstan oblysy