Parlament Senaty Konstıtýsııalyq zańnama, sot júıesi jáne quqyq qorǵaý organdary komıteti Atyraýda elimizdegi medıasııa salasyn damytý máseleleri boıynsha kóshpeli otyrys ótkizdi.
Komıtet aımaqqa sapardyń alǵashqy kúni «Daýlasýshylylyqty tómendetýdegi medıasııa rásiminiń róli» taqyryby boıynsha Senatta 2017 jylǵy 25 qazanda ótken dóńgelek ústeldiń usynymdaryn iske asyrý nátıjeleri týraly kóshpeli otyrys ótti. Sondaı-aq Qazaqstan halqy Assambleıasynyń, Qazaqstan Joǵarǵy Sotynyń, memlekettik organdar men qoǵamdyq birlestikter ókilderiniń qatysýymen jumys babyndaǵy kezdesý boldy.
Komıtet tóraǵasy G.Kım kezdesýdi asha kelip, Qazaqstannyń sot tóreligi júıesinde medıasııa ınstıtýtynyń rólin atap ótti. Negizgi baıandama jasaǵan senator V.Volkov Úkimettiń osy saladaǵy jumysy men medıasııa rásimderin júzege asyrý barysyn synǵa aldy jáne ýákiletti memlekettik organdardyń arasyndaǵy kúsh-jigerdi úılestirýdiń jetimsizdigi týraly máseleler aıtyldy.
Qazaqstan halqy Assambleıasy Tóraǵasynyń orynbasary - QHA Hatshylyǵynyń meńgerýshisi L. Prokopenko, elimizdiń Joǵarǵy Sotynyń sýdıasy U. Súleımenova, Ádilet mınıstriniń orynbasary E. Ázimovanyń jáne tájirıbeli medıatorlardyń baıandamalary tyńdaldy.
Komıtettiń kóshpeli otyrysynyń barysynda Memleket basshysy N.Nazarbaevtyń daýlardy sotqa deıingi retteý ádisterin damytý qajettigi týraly aıtqan tapsyrmalaryn júzege asyrý máselelerin senatorlar jan-jaqty talqylady. Aıtylǵan usynystar medıasııany odan ári damytý boıynsha zań shyǵarý jumystary barysynda eskeriletin bolady.
Konstıtýsııalyq zańnama, sot júıesi jáne quqyq qorǵaý organdary komıtetiniń kóshpeli otyrysynyń qorytyndysy boıynsha Úkimettiń medıasııa salasyndaǵy budan bylaıǵy jumystaryna qorytyndy berildi.
Jumys babyndaǵy kezdesýde medıasııa týraly qoldanystaǵy zańnamaǵa qajetti ózgerister talqylandy. Salalyq mekemelerde jańa «Qazaqstan Respýblıkasynyń keıbir zańnamalyq aktilerine daýlardy sottan tys jáne sotqa deıingi retteý ınstıtýttaryn damytý máseleleri boıynsha ózgerister men tolyqtyrýlar engizý týraly» zań jobasyn ázirleý jónindegi jumystar qolǵa alyndy. Ondaǵy túzetýler neke jáne otbasy, muragerlik, jumyspen qamtý, áleýmettik, kórshiler men jer daýlaryna qatysty azamattyq jáne qylmystyq isterdiń jekelegen sanattaryna medıasııany mindetti túrde paıdalanýdy ulǵaıtýǵa baǵyttalǵan bolady.
Pikirsaıysty senator G.Kım qorytyndylady. Onyń aıtýynsha, aıtylǵan usynymdar medıasııa salasyn retteıtin zań jobalaryn qarastyrý barysynda paıdalanylatyn bolady.
Sol kúni depýtattar Atyraý qalasyndaǵy Quqyq qorǵaý qyzmetin kórsetý ortalyǵyna baryp, onyń tehnıkalyq jabdyqtalýymen tanysty. Prokýrorlar, advokattar jáne medıatorlarmen áńgimelesý barysynda senatorlar qylmystyq zańnamadaǵy ózgerister men jańalyqtar jáne daýlardy sheshýdiń balama ádisterin keńeıtýdiń keleshegi týraly aıtyp berdi. Ortalyq medıatorlaryn osy sala qyzmetterin usyný standarttary qyzyqtyrdy.
Atyraý oblysyna sapar aıasynda depýtattar «Jigermunaıservıs» seriktestigi men Atyraý munaı óńdeý zaýytynda bolyp, eńbek ujymdarymen kezdesti. Senatorlar jumysshylardyń eńbek jaǵdaıymen tanysyp, eńbek daýlaryn sheshýdegi medıasııa múmkindikteri týraly habardar etti.