«Nur Otan» partııasy Tóraǵasynyń birinshi orynbasary Máýlen Áshimbaev arnaıy saparmen Atyraý oblysynda boldy. Sapar barysynda ol bastaýysh partııa uıymdary jandandyrý aıasynda jasalyp jatqan jumystarmen tanysyp, Prezıdenttiń bes áleýmettik bastamasynyń jáne jańa partııalyq jobalardyń júzege asyrylý barysyna baqylaý júrgizip, birqatar áleýmettik nysandardy aralady.
Ústimizdegi jyldyń maýsym aıynda ótken partııanyń Saıası keńes otyrysynda Prezıdent bastaýysh partııa uıymdarynyń jumysyn jandandyrýdy tapsyrǵan bolatyn. 2018 jylǵy
1 shildedegi jaǵdaı boıynsha respýblıkamyzda 1 mln-nan astam partııa múshelerin biriktiretin 6 myńǵa jýyq bastaýysh partııa uıymy jumys isteıdi. Partııa qurylymyn jetildirý maqsatynda turaqty túrde músheleriniń sany az uıymdardy biriktirý arqyly BPU jelisin ońtaılandyrý prosesi júrgizilýde. Búginde «Nur Otan» partııasy bastaýysh partııa uıymdarynyń qyzmetin jandandyrý tujyrymdamasynyń jobasy ázirlenip, ony jan-jaqty talqylaý bastalyp ketken. Shymkent, Qaraǵandy, Pavlodar qalalarynda 800-ge jýyq partııa múshesiniń basyn qosqan «Bastaýysh partııa uıymdarynyń» forýmdary ótti. Alqaly jıyndarda jańa daıarlanǵan tujyrymdama jobasyna baılanysty aıtylǵan pikirler, usynystardyń barlyǵy iriktelip, jyl sońynda Astanada ótetin bastaýysh partııa uıymdarynyń respýblıkalyq forýmynda jarııalanatyn bolady.
BPU-nyń jumysyna baılanysty jańashyldyqtar týraly M.Áshimbaev «Atyraý munaı óńdeý zaýyty» bastaýysh partııa uıymynda ótken kezdesýde aıtty.
– Partııanyń irgetasy, basty kúshi – bastaýysh partııa uıymdary. Qazaqstandy úshinshi jańǵyrtý aıasynda Elbasynyń bastamasymen qolǵa alynǵan baǵdarlamalyq qujattardyń, partııalyq jobalardy júzege asyrý jolynda bastaýysh uıymdarynyń róli erekshe. Qazirgi kúni partııa qolǵa alǵan IT synyptar men IT ortalyqtaryn ashý, kitaphanalardy, mektep ashanalary men sport alańdaryn jańǵyrtý boıynsha jobalardy halyq arasynda nasıhattaý, túsindirý jumysyna belsendi qatysýlaryńyzdy kútemiz, – dedi M.Áshimbaev.
Aıta ketsek, munaı óńdeý zaýytynda 1 200-ge jýyq partııa múshesi eńbek etedi. Zaýyttyń bastaýysh partııa uıymy 2015 jyly respýblıkalyq «Úzdik bastaýysh partııa uıymy» baıqaýynda 2-oryndy ıelengen. Elimizdegi «Jas Otan» jastar qanaty men qoǵamdyq qabyldaý bólimi bar jalǵyz uıym. BPU janynda memlekettik tildi tereńdete oqytatyn ortalyq ta jumys isteıdi.
Prezıdenttiń tapsyrmasyna sáıkes «Nur Otan» partııasy tarapynan «Prezıdenttiń bes áleýmettik bastamasyn» iske asyrýǵa qoǵamdyq baqylaýdy uıymdastyrý maqsatynda ortalyq jáne óńirlik deńgeıde Qoǵamdyq keńester qurylǵan bolatyn. Qoǵamdyq keńestiń quramynda jetekshi saıası partııalardyń, Qazaqstan halqy Assambleıasynyń, Qazaqstan kásipodaqtar federasııasynyń, «Atameken» ulttyq kásipkerleriniń jáne óńirlik palatalarynyń, eldegi iri ÚEU-nyń basshylary men ókilderi, tanymal blogerler, salalyq sarapshylar men ǵalymdar bar.
«Nur Otan» partııasy Tóraǵasynyń birinshi orynbasary oblys ortalyǵynda Elbasynyń úshinshi bastamasy «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» boıynsha Atyraý qalasyndaǵy «Dına Nurpeıisova atyndaǵy Halyqtyq mýzyka akademııasy» Atyraý mýzyka kolledjiniń jataqhanasynda boldy. Oqý ornynda bıyl 4 qabatty 100 jatar orynǵa arnalǵan jataqhana qoldanysqa berildi.
Nysandy aralaǵan partııa Tóraǵasynyń Birinshi orynbasary 2018 jyly «QazTransOıl» kompanııasynyń Batys fılıaly Halel Dosmuhamedov atyndaǵy Atyraý memlekettik ýnıversıtetine 700 orynǵa arnalǵan jataqhana bergenin atap ótti. Jyl sońyna deıin qosymsha taǵy da 200 oryndyq eki jataqhana tapsyrylady dep josparlanǵan.
Elbasynyń bes áleýmettik bastamasynyń taǵy biri – shaǵyn nesıe berýdi kóbeıtý. Osy bastamanyń oblysta qalaı júzege asyrylyp jatqanyn qadaǵalaý úshin M.Áshimbaev «Caspiy Lana Atyrau» JShS-i alańynda ornalasqan «Bastaý Bıznes» baǵdarlamasy boıynsha kásipkerliktiń qyr-syryn úıretetin ortalyqta boldy. Osy baǵdarlama boıynsha 2018 jyly oblystyq bıýdjetten 2 mlrd teńge, respýblıkalyq bıýdjetten qosymsha 589 mln teńge bólingen. «Bastaý Bıznes» baǵdarlamasy aıasynda Atyraý aımaǵynda 750 adam bilimin jetildirgen.
Sondaı-aq Máýlen Áshimbaev oblystyq ońaltý ortalyǵynda ornalasqan «Múgedek álemi» qoǵamdyq birlestiginiń jumysymen tanysty. 2009 jyly irgesi qalanǵan ortalyq – «Úzdik áleýmettik joba» baıqaýynyń aımaqtyq jeńimpazy. Aıta ketsek, qoǵamdyq birlestik 2011 jyly «Invataksı» qyzmetin iske qosqan. M.Áshimbaev Elbasynyń tapsyrmasy boıynsha bul salada sońǵy jyldary elimizde aýqymdy jumys atqarylyp jatqanyn, arnaıy baǵdarlama qolǵa alynyp, múmkindigi shekteýli jandardyń múddesin qorǵaıtyn zańdar qabyldanǵanyn da atap ótti. Alaıda bul tek memlekettiń ǵana mindeti emestigin, oǵan búkil qoǵamnyń atsalysýy tıis ekenin aıtqan ol partııa tarapynan da aıtarlyqtaı is-sharalar qarastyrylǵanyna toqtaldy.
M.Áshimbaev Atyraý bilim-ınnovasııa lıseı-ınternaty bazasynda «Balalarǵa arnalǵan tegin IT synyptar» partııalyq jobasyn júzege asyrý maqsatynda boı kótergen IT synypty aralap kórdi. Aıta ketý kerek, bıyl óńirde budan basqa álemdik talaptarǵa saı 8 jastan 16 jasqa deıingi balalardy baǵdarlamalaýshy jáne robottehnıka negizderine oqytatyn 10 IT synyp ashylǵan. Bul mektepterde 2018 jyly – 700, 2019 jyly – 1500, 2020 jyly 2000 balany oqytý josparlanyp otyr.
M.Áshimbaev Halel Dosmuhamedov atyndaǵy Atyraý memlekettik ýnıversıtetinde ashylǵan «ISpace» kovorkıng ortalyǵynda da boldy. Kovorkıng keńistigi bir ýaqytta 80 rezıdentti qabyldaýǵa arnalǵan. Qazirgi zamanǵy ınfraqurylymmen jabdyqtalǵan. Jeke jumys oryndarymen pikir almasý bólmeleri, demalys aımaǵy bar.
Sonymen qatar Máýlen Áshimbaev aımaqtaǵy partııa aktıvimen kezdesti. Kezdesýde Prezıdenttiń bes áleýmettik bastamasynyń jáne jańa partııalyq jobalardyń júzege asyrylý barysyna baqylaý júrgizip, atqarylǵan jumys barysy talqylandy.
Baqytgúl BABASh,
«Egemen Qazaqstan»
ATYRAÝ