Jetisýda topyraǵynda týyp-ósken azamattar oblystyń kitaphanasyna 1500 dana kitapty syıǵa tartty. Júzden astam avtordyń eńbekterinen quralǵan kitapdy endi oblystyq Seıfýllın atyndaǵy ámbebap kitaphana men Taldyqorǵandaǵy «VIP ZHETYSU» kitaphanasynan oqýǵa bolady.
Bastamany ataqty hırýrg, professor Nurlan Aryn qolǵa alyp, júzege asyrypty. Oǵan ǵalym Erlan Aryn men «Arys» baspasynyń dırektory, fılologııa ǵylymdarynyń doktory Ǵarıfolla Ánes qoldaý kórsetipti. Nátıjesinde quny 1 mıllıon 200 myń teńge turatyn kitap qory jınaqtaldy.
Aıtpaqshy, Nurlan Muhtarulynyń elge jasaǵan alǵashqy syılyǵy emes. Ol týǵan jerinen qol úzbegen azamat. Jáne ol altyn qoldy otashy ǵana emes, em-dom baǵytynda 220 ǵylymı eńbek jazyp, 1 ǵylym doktoryn, 8 ǵylym kandıtatyn tárbıelegen bilikti ustaz retinde belgili. Osy qysta Sarqan aýdandyq aýrýhanasynda Álıhan esimdi balaqaıǵa óńesh plastıkasy otasyn jasap, búldirshindi ajaldan arashalap qalǵan bolatyn. Ári ol bul otany eshqandaı aqysyz, tegin jasaǵan edi.
- Bul bastama – Jetisý jurty úshin baǵaly qazyna. Al, osy kitaptardy týǵan halqyna arnaıy syıǵa tartyp otyrǵandardyń biri – belgili ǵalym-hırýrg Nurlan Aryn. Ol jyl saıyn týǵan jeri Sarqan aýdanyna kelip, jerlesterine tegin medısınalyq qyzmet kórsetýdi dástúrge aınaldyrǵan. Osynyń barlyǵy ǵalymnyń týǵan aımaǵyna jasap jatqan qamqorlyǵy, – deıdi kitaptardy Almatydan arnaıy baryp alyp kelgen Almaty oblysy О́ńirlik kommýnıkasııalar qyzmeti basshysynyń orynbasary Rústem Kanapııanov.
Jurt yqylasyna bólengen dáriger óziniń kásibı qyzmetinen bólek, óńir rýhanııatynyń damýyna da úles qosqany quptarlyq is.
Qalmahanbet MUQAMETQALI,
«Egemen Qazaqstan»
Almaty oblysy