Uly Dala Eline saıahat» jobasy sheńberinde ótip jatqan «Jańa Jibek joly» baǵyty boıynsha ekspedısııa búgin Almaty qalasyna kelip jetti, dep habarlaıdy «Kazakh Tourism» Ulttyq kompanııasy
Jobanyń altynshy baǵyty 17 qyrkúıekte jolǵa shyqqanyn esterińizge sala keteıik. 13 kúnde qatysýshylar Almaty, Jambyl jáne Túrkistan oblystaryna baryp qaıtatyn bolady.
Mádenıet jáne sport mınıstrligi Týrızm ındýstrııasy komıtetiniń tapsyrysy boıynsha ekspedısııany uıymdastyrýshy «Kazakh Tourism» Ulttyq kompanııasy. «Jańa Jibek joly» ekspedısııasynyń baǵytyn «QazaqGeography» Respýblıkalyq qoǵamdyq birlestigi júzege asyrýda.
Ekspedısııa quramy tájirıbeli saıahatshylardan, týroperator ókilderi men sheteldik jáne qazaqstandyq trevel-blogerlerden, sondaı-aq «National Geographic Rossııa» komandasynan quralǵan.
Ekspedısııanyń alǵashqy kúnderi Almaty oblysynda ótti. Qatysýshylar Qazaqstan-Qytaı shekarasynda bolyp, Qorǵas beketine barar jolda Jarkenttegi erekshe meshitke soqty. Bul meshit birde bir shegesiz, Tıan-Shan shyrshasynan salynǵan. Ary qaraı ekspedısııa músheleri Qazaqstandaǵy eń kórikti jerlerdiń biri – Kólsaıǵa baryp, onyń sulý kólderi men Qaıyńdy kólin tamashalady.
Ary qaraı ekspedısııa Aqtaý taýyna, Aıǵaıqumǵa, Shoqan Ýálıhanov bulaǵyna, Talhız qalashyǵyna baryp qaıtty. Sondaı-aq saıahatshylar Almaty oblysynda IýNESKO dúnıejúzilik murasynyń nysany bolyp tabylatyn Tamǵaly shatqalynda boly.
Búgin ekspedısııa músheleri Almaty qalasynyń kórikti jerleri: «Medeý» muzaıdynyn, «Shymbulaq» TShK men Úlken Almaty kólin tamashalady. Bul jerler árqashan Qazaqstandyq jáne sheteldik týrısterdi ózine tartady. Odan bólek, Almatyda saıahatshylarymyzdy qazaqstan estradasynyń juldyzy – Qazaqstan Respýblıkasynyń eńbek sińirgen qyzmetkeri Baqyt Shadaeva qarsy aldy.
«Qazaqstanda ishki týrızmdi damytýǵa burynǵydan da kóp kóńil bólinip jatqany úshin qýanyshtymyn. Otanymyzdyń sulýlyǵyn aıtýǵa sóz jetpeıdi, tabıǵaty qandaı kórkem, ári sulý! Almatyǵa berekeli kúz kezinde keldińizder, jemis-jıdek pisken, kúzdiń keremet keshterine kýá bolatyn sát. Oǵan qosa, ekspedısııalaryńyzǵa óz isiniń has sheberleri jınalypty. Qazir joldyń dál ortasyna kedińizder, alda jańa jerler áli de kóp. Búgin kóptegen áser alyp, jańa dúnıelermen tanysasyzdar dep úmittenemin. Qazaqstannyń beımálim jerlerin zertteıtin baǵyttaryńyz – Jańa Jibek jolynda saparlaryńyz sátti bolsyn», - dep ánshi Baqyt Shadaeva óz áserimen bólisip, sát sapar tiledi.
Sodan soń qatysýshylar eki myń jyldyq tarıhy bar ejelgi Taraz qalasyna barady. Erte kezden beri Uly Jibek jolynyń boıynda turǵandyqtan bul qalanyń mańyzy óte joǵary bolǵan. Tarazdyń jáne onyń aınalasynyń kórikti jerlerin kórip bolǵan soń, joba qatysýshylary Jambyl jáne Túrkistan oblystarynyń aýmaǵynda ornalasqan, Orta Azııa men Qazaqstandaǵy eń eski qoryqtardyń biri Aqsý-Jabaǵylyǵa bet alady.
Ary qaraı olar Batys Tıan-Shan taýlarynyń soltústik-shyǵysyndaǵy Saıram-О́gem memlekettik ulttyq tabıǵı saıabaǵyna baryp, sol jerden teńiz deńgeıinen 2350 metr bıikte ornalasqan Saıramsý kólin kórip qaıtady. Sondaı-aq qatysýshylar Túrkistan oblysynyń aýmaǵyndaǵy Otyrar qalasy, Arystan bab, Qoja Ahmet Iаssaýı keseneleri, Saýran qalasy men basqa da nysandar tárizdi arheologııalyq jáne tabıǵı eskertkishterge barady.