Býrabaıdaǵy «Jaqsy» sport kesheninde «Transtelekom» kompanııasynyń 3-shi jazǵy spartakıadasy bolyp ótti.
Kompanııanyń 15 fılıaly arasynda shaǵyn fýtboldan, ústel tennısi, ártúrli qashyqtyqqa júgirý, uzyndyqqa sekirý jáne basqa da sporttyq jarystar uıymdastyryldy. «Transtelekom» kompanııasy «Rýhanı jańǵyrý» baǵdarlamasy aıasynda balalar úıiniń talantty balalaryn qoldaý maqsatynda alǵash ret qaıyrymdylyq sharalaryn júzege asyrýda.
Atalmysh jarysqa Aqmola jáne Soltústik Qazaqstan oblystarynyń tórt balalar úıiniń jáne Petropavl qalasynyń otbasy úlgisindegi balalar aýylynyń tárbıelenýshileri qatysyp, shaǵyn fýtboldan jarys ótkizildi. Birinshi oryndy ıelengen Petropavl qalasynyń otbasy úlgisindegi balalar aýylynyń tárbıelenýshilerine gramota men kýbok tabys etildi. Al Aqkól balalar úıiniń «Arystan» komandasy ekinshi, Aıyrtaý balalar úıi úshinshi oryndy enshiledi. Sandyqtaý balalar úıiniń komandasy da yntalandyrý syılyǵyna ıe boldy. Sondaı-aq «Eń úzdik oıynshy» atalymy boıynsha Anatolıı Alash (Petropavl), Baýyrjan Ormanov (Aqkól qalasy), Nıkıta Jakýpov (Sandyqtaý), Roman Isaıkın (Aıyrtaý) marapattaldy.
Kompanııa ókilderi barlyq balalarǵa oqý quraldary salynǵan mektep sómkelerin syıǵa tartty. Jarystan soń balalar úıiniń tárbıelenýshileri Abylaı han alańy men ashyq aspan astyndaǵy Botaı-Býrabaı murajaıyn tamashalap, eskertkish sýretke tústi.
Atalmysh kompanııanyń qaıyrymdylyq isi basqalarǵa da úlgi bolsa, kánekeı.
Baıqal BAIÁDIL,
«Egemen Qazaqstan»
Aqmola oblysy,
Býrabaı aýdany