«Nur Otan» partııasy Tóraǵasynyń birinshi orynbasary Máýlen Áshimbaev 1 qazan – Halyqaralyq qarttar kúnine oraı Astana qalasyndaǵy «Ardager» demalys ortalyǵyna arnaıy baryp, elordalyq qarııalardy ataýly kúnmen quttyqtady.
Birikken Ulttar Uıymynyń Bas Assambleıasy 1990 jylǵy 14 jeltoqsanda 1 qazandy Halyqaralyq qarttar kúni dep jarııalaǵany belgili. Sodan beri bul merekeni búkil álem keń kólemde atap ótip keledi. Bul kúnniń basty maqsaty – qoǵam nazaryn qarııalardyń máselesine aýdaryp, ony halyqaralyq deńgeıde sheshýdiń tıimdi joldaryn qarastyrý.
– Ataýly kún bizdiń elde de eskerýsiz qalǵan emes. Soǵan oraı Qazaqstannyń ár óńirinde Qarttar kúnine oraı túrli is-sharalar uıymdastyrylyp keledi. Sonyń ishinde «Nur Otan» partııasy tarapynan da ıgi bastamalar qolǵa alynyp, júıeli jumystar júrgizilýde. Atap aıtqanda, «Ardagerlerdi ardaqtaıyq» partııalyq jobasy elimizdegi aq jaýlyqty analar men aq saqaldy atalarǵa laıyqty qurmet kórsetýdi qamtamasyz etedi. Elbasynyń tapsyrmasy boıynsha bastalǵan partııa qyzmetin jańǵyrtý aıasynda da bul máselege erekshe kóńil bólinip, tıisti sharalar qolǵa alynǵanyn atap ótken jón, – dedi óziniń sózinde M.Áshimbaev.
Qazirgi tańda jer betinde adamdardyń ómir súrý uzaqtyǵynyń óskeni baıqalady. Tipti mamandardyń aıtýynsha, 2050 jylǵa qaraı álem halqynyń kem degende 10 prosentin qarııalar quraıdy degen boljam bar. Sondyqtan álem osyǵan daıyndalyp, soǵan laıyq ınfraqurylym qalyptastyrǵany jón. Medısınalyq qyzmet kórsetýdi jetildirip, basqa da qyzmet túrlerin júıeli jolǵa qoıýdyń bereri mol bolmaq. Mundaı úrdisten Qazaqstan da tys qalmaıtyny sózsiz. Osy turǵydan kelgende, «Ardager» sııaqty ortalyqtardyń mańyzy zor. Sebebi bul jerde jasy kelgen jandar bir-birimen kezdesip, pikirlesýge, zeınetke shyqqannan keıin barlyǵynan qol úzip qalmaı, qoǵam ómirine belsene aralasýǵa múmkindik alady. Sondyqtan osyǵan laıyqty jaǵdaı jasaý qamtamasyz etilýi kerek.
«Ardager» demalys ortalyǵy – bas qalamyzda 20 jyldan beri jumys istep kele jatqan qoǵamdyq birlestik. Birlestik basshysy Baıan Ahmetjanovanyń aıtýynsha, munda qarııalarǵa bımen, ıogamen, aerobıkamen, fıtnestik jattyǵýlarmen aınalysýǵa múmkindik bar. Odan bólek, qarttarǵa túrli quqyqtyq keńester berilip, semınarlar men trenıngter de turaqty ótkizilip turady. Búginde ortalyqta árqaısysy 15 adamnan úsh top bar. Olarǵa barlyq qyzmet tegin kórsetiledi.
Búginde birlestik Birikken Ulttar Uıymynyń Ekonomıkalyq keńesi qurǵan qarttar máselesin álemdik deńgeıde qarastyratyn arnaıy topqa jáne 108 elde jumys isteıtin halyqaralyq Help Age International uıymyna múshe ekenin, soǵan oraı kóptegen elmen tájirıbe almasyp, baılanysyp turatynyn aıtqan B.Ahmetjanova aldaǵy ýaqytta mekemeni budan da keńeıtip, Qazaqstanda ardagerlerge qyzmet kórsetetin iri ortalyq ashýdy josparlap júrgenin jetkizdi. Mundaı bastamaǵa qoldaý bildirgen M.Áshimbaev elordamyzda atalǵan ortalyqtyń qurylýy ardagerlerimizge kórsetilgen úlken qurmet bolaryna nazar aýdardy.
Joldybaı BAZAR,
«Egemen Qazaqstan»