Batys Qazaqstan oblysynda kórnekti jazýshy Hamza Esenjanovtyń 110 jyldyǵyna arnalǵan mádenı is-sharalar ótip jatyr.
«Aq Jaıyq» trılogııasynyń avtory, Qazaqstan Memlekettik syılyǵynyń laýreaty, «Eńbek Qyzyl Tý» jáne «Qurmet belgisi» ordenderiniń ıegeri Hamza Yqsanuly Esenjanovtyń 110 jyldyq mereıli tolýyna oraı Oral qalasyndaǵy «Jeńis» saıabaǵynda jazýshyǵa bıýst ornatylyp, merekelik is-sharalar bastaldy.
Eskertkish belginiń ashylýyna Almaty qalasynan akademık, Ál-Farabı atyndaǵy Qazaq Ulttyq ýnıversıtetiniń professory, bıologııa ǵylymdarynyń doktory, Hamza Esenjanovtyń nemere inisi Aıtqoja Bıǵalıev, Abylaı han atyndaǵy Halyqaralyq qatynastar jáne álem tilderi ýnıversıtetiniń professory, fılolgııa ǵylymdarynyń kandıdaty, jazýshynyń kelini Dına Esenjan, Qazaqstan Jazýshylar odaǵy Batys Qazaqstan oblystyq fılıalynyń jetekshisi, «Alash» syılyǵynyń ıegeri, aqyn Aqushtap Baqtygereeva, Oral qalasynyń ákimi Murat Muqaev, ádebıetshi-zertteýshi Saılaý Súleımenov, tarıhshylar, ólketanýshylar, kitaphanashylar, ustazdar, stýdentter jáne mektep oqýshylary qatysty.
Budan keıin Hadısha Bókeeva atyndaǵy Batys Qazaqstan oblystyq qazaq drama teatrynda «Hamza Esenjanov – adamzattyń asyly» atty aýqymdy mádenı jıyn bolyp, jazýshynyń ómiri men shyǵarmashylyǵyna arnalǵan «Tuǵyry bıik talant» atty estelik kitaptyń tusaýy kesildi.
Mádenı jıyn aıasynda teatr foıesinde «Qaısar talant arqalaǵan nar senim, umytpaıtyn urpaqtaryń bar seniń» degen taqyryppen kólemdi kitap kórmesi, foto-ekspozısııa jáne muraǵattyq jádigerler kórermen nazaryna usynylǵan.
Qazbek QUTTYMURATULY,
«Egemen Qazaqstan»
Batys Qazaqstan
Fotosýretterdi túsirgen Rafhat Halelov