Qazaqstan Respýblıkasynyń Tuńǵysh Prezıdenti – Elbasynyń kitaphanasynyń el rýhanııatynda alar orny erekshe. Búginde osynaý ulan-ǵaıyr qory bar kitaphana qazaq rýhanııatynyń altyn tuǵyryna aınalyp otyr.
Munda Elbasymyzdyń ózi jazǵan kitaptarymen qatar, memleket basshylary jáne qazaqstandyq avtorlar tartý etken qoltańbaly kitaptar, Prezıdenttiń joǵary memlekettik nagradalarynyń jınaǵy, sonymen qatar Nursultan Ábishulynyń shet tilderge aýdarylǵan eńbekteri, mýzeı eksponattary men arhıv qujattary qoıylǵan. Tipti Elbasynyń ata-anasy tutynǵan zattar da kórme ajaryn ashyp tur. Bul mekeme kitaphana, mýzeı, arhıv qyzmetimen tikeleı aınalyssa da, qyzmet baǵyty bylaıǵy kópshilik kitaphanalardan múlde ózgeshe. Qyzmet aýqymy óte keń. Alaıda ony kórý múmkindigine kóbine astanalyqtar men onyń qonaqtary ǵana ıe bolyp kelgeni jasyryn emes. Sondyqtan ótken jyldan bastap Elbasy kitaphanasy elimizdiń oblystarynda «N.Nazarbaev: dáýir, tulǵa, qoǵam» degen taqyrypta Qazaqstannyń Tuńǵysh Prezıdenti – Elbasy kitaphanasynyń kóshpeli qor kórmesin ótkize bastady. Aldymen óz jumysyn Almaty men Shymkentte bastaǵan kórme osy jyldyń 18 qyrkúıeginen beri jumysyn Atyraýda, oblystyq Sh.Sarıev atyndaǵy kórkem sýret jáne qoldanbaly sándik óner mýzeıinde jalǵastyryp jatyr. Bir aı ýaqyttan beri kórmeniń basty qyzmet kórsetýshisi bolyp otyrǵan mýzeı ujymy bul mádenı oqıǵaǵa úlken daıyndyqpen keldi. Osy merzim ishinde kórmeni júz myńǵa jýyq kórermen tamashalady. Bul kórmeden Nursultan Ábishulynyń aýyl balasynan bastap Elbasyna aınalýyna deıingi ómir joly týraly arhıvtik qujattar, foto-beıne materıaldar, mýzeılik eksponattar oryn alyp otyr. Kórmege birneshe ǵasyr burynǵy jádigerler de qoıylǵan. Sonyń biri – qazaq-jońǵar shapqynshylyǵynda el qorǵaǵan shapyrashty Bólek batyrdyń dýlyǵasy. Bolat metall men tabıǵı tastardan naqyshtalǵan bul jádiger HVII ǵasyrǵa tıesili eken.
Tólegen ORYNBASARULY,
Atyraý oblystyq Sh.Sarıev atyndaǵy kórkem sýret jáne qoldanbaly sándik óner mýzeıiniń basshysy