Qurlyqtyq hokkeı lıgasynda (QHL) kúsh synasyp júrgen Astananyń «Barysy» óz aıdynynda ótken kezekti týrda Mınskiniń «Dınamosyn» qabyldap, 3:1 esebimen utty.
Alǵashqy kezeńniń aıaqtalar tusynda «Barys» oıynshysy Dmıtrıı Gýrkov esepti ashqan bolatyn. Alaıda tóreshi bul shaıbany esepke almady. Beıne qaıtalaý barysynda elorda komandasynyń oıynshysy shaıbany aıaqpen soqqany belgili boldy. Sóıtip oıyndaǵy esep ekinshi kezeńde bir-aq ashyldy. 31-mınýtta Dmıtrıı Shevchenko «Barysty» esepte alǵa shyǵarsa, arada alty mınýt ótkende Andre Petersson esepti 2:0-ge jetkizdi.
Úshinshi kezeńdi qonaq komanda jyldam shabýylmen bastap, esepti qysqartýǵa múmkindik aldy. Shaıba avtory – Denıs Osıpov. Degenmen 48-mınýtta Dastın Boıd oıyndaǵy qorytyndy shaıbany soǵyp, «Barysqa» jeńis syılady.
Osy jeńisinen keıin astananyń klýby QHL-dyń Shyǵys konferensııasyndaǵy jarys kestesinde 6-orynǵa kóterildi. «Barys» 18 kezdesýden keıin 26 upaı ıelenip otyr.
Daıyndaǵan Álı BITО́RE,
«Egemen Qazaqstan»