Áıelder kúresiniń ókilderi Vengrııanyń astanasy –Býdapeshte ótip jatqan álem chempıonatyn búgin aıaqtaıdy. Ázirge alty salmaq dárejeleriniń jeńimpazdar men júldegerler anyqtaldy. Búgin túnde taǵy tór salmaqtyń úzdikteri belgili bolady.
55 kılo salmaqta japonııalyq Maıý Mýkaıdanyń mereıi ústem boldy. 2016 jyly álem chempıony atanyp, byltyr fınalda utylǵan ol bıyl qaıta altynnan alqa taǵyndy. Belarýssııalyq Zalına Sıdakova kúmis alsa, kýbalyq Lıenna Montero men soltústikkoreıalyq Chon Men Sýk qolaǵa qol sozdy. 59 kılo salmaqta da japondardyń juldyzy jandy. Rıo Olımpıadasynyń jeńimpazy degen dardaı ataǵy bar Rısako Kavaı jýyrda ǵana Jakartada ótken Azııa oıyndarynda úshinshi orynda qalyp qoıǵan edi. Sol kezde onyń kóńili qatty qulazydy. Al Býdapeshte bári ornyna qaıta keldi. Aqtyq synda túrkııalyq Elıf Jale Eshilyrmaqtan aılasyn asyrǵan Kavaı qatarynan ekinshi márte álem chempıony atanyp otyr. Qytaılyq Peı Sınjý men mońǵolııalyq Baatarjavyn Shoovdor qola medaldi enshiledi.
65 kılo salmaqta Fınlııandııanyń ókili Petra Ollı top jarsa, kanadalyq Danıella Lappa kúmispen kúpteldi. Japonııalyq Aına Gampeı men ázirbaıjandyq Irına Netreba qolany qanaǵat tutty. 68 kılo salmaq dárejesinde Alla Cherkasovaǵa teń keler eshkim tabylmady. Osydan segiz jyl buryn Máskeýde alǵan qola medalin Ýkraına balýany bıyl Býdapeshte altynǵa almastyrdy. Fınalda ol fransııalyq Kýmba Larakýdy qapy qaldyrdy. Qytaılyq Chjoý Fen men amerıkalyq Tamara Mensa úshinshi satyǵa jaıǵasty.
72 kılo salmaqtyń aqtyq synynda kanadalyq Jıýstına Dı Stasıo men mońǵolııalyq Nasanbýrma Ochırbat kezdesip, bul báseke Úıeńki japyraqtar eli ókiliniń jeńisimen aıaqtaldy. Túrkııalyq Býze Tosýn men avstrııalyq Martına Kıýnske buıyrǵany qola júlde. 76 kılo salmaqta amerıkalyq arý Adelına Greı altyn tuǵyrǵa kóterildi. Fınalda AQSh sportshysy túrkııalyq Iаsmın Adardan aılasyn asyrdy. Kanadalyq Erıka Vıbe men japonııalyq Iroe Mınagava Sýzýkı úshinshi satyǵa taban tiredi.
О́kinishke qaraı, áıelder kúresinen Qazaqstan quramasynyń qorjynynda birde-bir medal joq. Búgin qalǵan tórt salmaq dárejesiniń júldeleri sarapqa salynady. Sonymen qatar, grek-rım kúresi sheberleri óz básekelerin bastaıdy. Búgin Janserik Sársenbıev (55 kılo), Aıdyn Nugymanov (63 kılo), Demeý Jadyraev (72 kılo) jáne Maqsat Erejepov (82 kılo) boz kilemge shyǵady.
Ǵalym SÚLEIMEN,
«Egemen Qazaqstan»