Bıyl jyl sońyna deıin Shıeli aýdanyndaǵy tamponajdy sement zaýyty iske qosylady.
Qazaqstandyq «DANAKE korporasııasy» men qytaıdyń «Gezhouba Group Cement Co. Ltd» sement kompanııasy birlesip paıdalanýǵa beretin zaýyttyń bolashaǵy úlken.
«Gejýba Shıeli Sement» JShS zaýyty jobasynyń jalpy quny 64 mlrd teńge. Bas merdigeri «Chaına Trıýmf Interneshnl» – álemdegi úzdik 50 halyqaralyq kóshbasshy kompanııa qataryna jatady. Zaýyt tolyqtaı iske qosylǵanda munda 300-ge jýyq jumysshy eńbek etetin bolady.
Zaýyt jylyna 1 mln tonna tamponajdy sement óndiredi dep kútilip otyr. Shyǵaratyn ónim atom ónerkásibi men gaz-munaı salasynda suranysqa ıe. Shıkizaty asa qymbatqa túspegendikten, ónimniń baǵasy da qoljetimdi bolady. Qazir dolomıt, ýaq tas jáne qum karerleri jumysqa daıyn.
Memleket zaýyt qurylysyna aýmaǵy 46 gektar bolatyn jer telimin bólgen. 4 gektar jerge qyzmetkerlerge arnalǵan jataqhana jáne basqa da áleýmettik qurylystar boı kóterdi.
Baqtııar TAIJAN,
«Egemen Qazaqstan»
Qyzylorda oblysy