Búgin elordadaǵy «MEGA Silk Way» oıyn-saýyq ortalyǵynda «Kaspıı Qubyr Konsorsıýmy» jáne «National Geographic Qazaqstan» jýrnalynyń birlese uıymdastyrýymen «Uly dala kıesi» atty fotokórme ashyldy.
Sharanyń ashylý rásimine Qazaqstan Respýblıkasy Parlamenti Májilisi Tóraǵasynyń orynbasary Vladımır Bojko, Senat depýtaty, áleýmettik-mádenı damý jáne ǵylym komıtetiniń tóraıymy Birǵanym Áıtimova, Májilis depýtaty Zaǵıpa Balıeva jáne «Kaspıı Qubyr Konsorsıýmy» AQ bas dırektorynyń orynbasary Qaıyrgeldi Qabyldın qatysty.
Kórmeniń negizgi maqsaty – kópshilik arasynda ekologııalyq mádenıetti qalyptastyrý, dalanyń ań-qustary, onyń ishinde qazaqqa etene jaqyn kıikter týraly turǵyndardyń tanym kókjıegin keńeıtýge jáne qorshaǵan ortany qorǵaý problemalaryna qoǵamnyń nazaryn aýdartý.
Qazaqqa etene jaqyn osy janýardy qorǵaý jáne saqtap qalý isinde «Kaspıı Qubyr Konsorsıýmy» (KQQ) qosqan úlesi zor. Bul kompanııa bókenderdi ǵaryshtan baqylaýǵa múmkindik beretin 30 dana qarǵybaý satyp alýǵa 2016 jyly 21 mıllıon teńge bólse, ótken jyldyń ózinde tek zertteý jumystaryna 27 mıllıon teńge qarastyrǵan. Odan bólek KQQ Qazaqstan óz táýelsizdigin alǵaly beri el aýmaǵynda quny 8 mıllıard teńgege júzden asa áleýmettik jobany qarjylandyrǵan.
Tas dáýirinde Batys Eýropaǵa deıin tirshilik etken sol janýar osy kúni Mońǵolııa, Qalmaq dalasy men Qazaqstanda ǵana saqtalyp qalǵan. Olardyń 90 paıyzy qazaq jerinde mekendeıdi. Kıikterdiń taǵy bir ereksheligi – eshqashan jetim qalǵan laqtaryn dalaǵa tastamaıdy. Al kez kelgen kıik jolynan mańyrap shyqqan quralaıdy kezdestire qalsa, janyna baryp emizip, ózimen ertip ketedi.
Shara barysynda kıikter týraly beınerolık pen sátti túsirilgen fotosýretter jıyntyǵy kórsetilip, konserttik baǵdarlama uıymdastyryldy.