Sporttyq jekpe-jek jáne kúsh qoldanatyn sport túrleri konfederasııasynyń fınaldyq saıystary 8-9 jeltoqsan aralyǵynda Almatydaǵy Balýan Sholaq atyndaǵy sport saraıynda ótedi.
Jyl saıyn respýblıkamyzdyń barlyq óńiri ókilderiniń basyn qosyp, komandalyq jarystarda kimniń úzdik ekenin anyqtaıtyn dúbirli dodany jankúıerler árkez taǵatysyzdana kútýde. Osy kúnge deıin kúres túrleri, boks, taekvondo, dzıýdo jáne qazaq kúresinen ótken toptyq týrnırlerinde dara shyqqan komandalar tolyqtaı anyqtaldy. Endi solardyń arasynan qaı óńirdiń órenderi oza shabatynyn Alataý baýraıynda jalaýy jelbireıtin osy jarys barysynda belgili bolady. Bul týrnırdiń júlde qory 145 mıllıon teńgeni quraıdy.
Boksshylar básekesinde Qaraǵandy, Ońtústik Qazaqstan, Mańǵystaý oblystary men Astana qalasy kúsh synasady. Dzıýdoshylar arasyndaǵy tartys Batys Qazaqstan, Qaraǵandy, Atyraý jáne Qyzylorda balýandary arasynda ótedi. Taekvondoshylar týrnırinde top jaratyn komanda Pavlodar men Túrkistan oblystary jáne Almaty qalasy ókilderi arasyndaǵy tartysta anyqtalady. Erkin kúres sheberleriniń saıysynda Shyǵys Qazaqstan men Túrkistan oblystary jáne Almaty men Astana qalalarynyń órenderi baq synaıdy. Grek-rım kúresinen uıymdastyrylatyn básekede Almaty qalasy, Qostanaı, Almaty jáne Shyǵys Qazaqstan oblysynyń apaıtósteri sheberlik baıqasady. Qazaq kúresinen ótetin jarys Astananyń «Elorda batyry», Almatynyń «Qazaqkuresi» jáne Qaraǵandynyń «Qaraǵandy oblysy qazaq kúresi» (Qaraǵandy) jáne «ZAK KAR» klýbtary arasynda ótedi.
Ǵalym SÚLEIMEN,
«Egemen Qazaqstan»
ALMATY