Kezdesýge Qazaqstan Respýblıkasynyń Qoǵamdyq damý mınıstri D.Káletaev, Túrkııa Respýblıkasynyń Jastar jáne sport mınıstri M.Kasapoglý, Túrki tildes memleketter yntymaqtastyǵy keńesiniń bas hatshysy B.Ámireev, Ázerbaıjan Respýblıkasynyń Jastar jáne sport vıse-mınıstri I.Ismaılov, Qyrǵyz Respýblıkasynyń Jastar, dene shynyqtyrý jáne sport isteri agenttiginiń dırektory Q.Amanqulov qatysty.
Kezdesý barysynda Gúlshara Ábdiqalyqova Memleket basshysy Nursultan Nazarbaevtyń «Uly dalanyń jeti qyry» atty maqalasyndaǵy «Qazaqstan – kúlli túrki halyqtarynyń qasıetti «Qara shańyraǵy». Búgingi qazaqtyń saıyn dalasynan álemniń ár túkpirine taraǵan túrki tektes taıpalar men halyqtar basqa elder men óńirlerdiń tarıhı úderisterine eleýli úles qosty» degen sózderine toqtaldy.
– Halyqaralyq arenada túrki halyqtarynyń tatýlyǵy men birligi ıdeıasyn nyǵaıtý isinde Túrki tildes memleketter yntymaqtastyǵynyń keńesi mańyzdy oryn alady, – dedi Memlekettik hatshy.
Bul uıymnyń qoldaýymen jastar jáne sport salasynda is-sharalar belsendi túrde ótkizilip keledi. Baký qalasynda 2018 jylǵy sáýirde tuńǵysh ret túrki tildes elderdiń stýdenttik oıyndary, qyrkúıekte Sholpan-Ata qalasynda Kóshpendilerdiń III dúnıejúzilik oıyndary ótkizildi. Kóshpendilerdiń IV dúnıejúzilik oıyndaryn 2020 jyly Túrkııada ótkizý josparlanýda.
– Jastar jyly dep jarııalanǵan aldaǵy jyl Qazaqstan úshin mazmundy bolmaq. Bul jastarǵa, olardyń muń-muqtajyna, Qazaqstannyń bolashaǵyna erekshe kóńil bólýdiń kórinisi bolyp sanalady, – dedi G.Ábdiqalyqova.
Kezdesý sońynda Memlekettik hatshy Gúlshara Ábdiqalyqova Túrki tildes memleketter yntymaqtastyǵynyń keńesi aıasyndaǵy ózara is-qımyldy odan ári nyǵaıtý isinde qatysýshylarǵa tabys tiledi.