Premer-Mınıstr Baqytjan Saǵyntaev pen «Atameken» ulttyq kásipkerler palatasy tóralqa tóraǵasy Tımýr Qulybaevtyń qatysýymen kásipkerler palatasy tóralqasynyń keńeıtilgen otyrysy ótti.
Sóz basyn bıylǵy jyldy qorytyndylaýmen bastaǵan Úkimet basshysy jyl basynan bastap jańa Salyq kodeksiniń kúshine engenin, kedendik alymdar kezinde ashyqtyqty qamtamasyz etý úshin taıaýda qabyldanǵan jańa Keden kodeksiniń jumys istep jatqanyn, halyqaralyq saýdany damytý úshin kedendik ınfraqurylymnyń jaqsartylǵanyn, Kásipkerlik kodeksine júıeli ózgerister engizilgenin jetkizdi. Sondaı-aq Memleket basshysynyń tapsyrmasymen 2019 jyldyń 1 qańtarynan bastap 89 myń shaǵyn jáne orta bıznes sýbektilerine salyq amnıstııasyn jarııalaý, naqtyraq aıtar bolsaq, ósimaqy men aıyppuldardy syzyp tastaý týraly sheshim qabyldanǵanyn, salyqtyq zań buzýshylyqtar úshin qylmystyq jaýapkershilikke tartýdy kúsheıtý máseleleriniń de qaralyp jatqanyn aıtty. Jalpy, sońǵy jyldary Úkimettiń «Atameken» palatasymen birlese atqarǵan jumystarynyń nátıjesinde bızneske baqylaý-qadaǵalaýdyń tómendegeni anyq. Bızneske mundaı erkindikter berýde ekonomıkany sıfrlandyrýdyń úlesi orasan ekenin málimdegen Úkimet basshysy qazaqstandyq kásipkerlerdiń eksport geografııasyn keńeıtý máselesine de toqtaldy.
«Qazir barlyq naryq ashylyp jatyr. Ásirese Qytaıdyń úlken naryǵyn erekshe atap ótken jón. Qytaı úkimeti tarapynan da usynystar boldy. Qytaılyq áriptesterimiz bizben birlesken kásiporyndar qurý arqyly ónimderdi úshinshi elderge satýǵa qulshynyp otyr. Bul degenimiz – otandyq kásipkerler qytaılyq áriptesterimen birlesip, Qytaı arqyly Ońtústik Azııaǵa shyǵa alady. Osy múmkindikti sátti paıdalanamyz dep úmittenemin», dedi B.Saǵyntaev. Premer-Mınıstrdiń pikirinshe, búginde qazaqstandyq kásipkerler biraz ónimderin Qytaıdyń ózine tasymaldaı almaıdy. Degenmen, taýarlardy osy memleket arqyly Ońtústik Azııaǵa shyǵarýǵa ábden bolady.
Sonymen qatar B.Saǵyntaev álemde saýdanyń elektrondy formatqa aýysyp jatqanyn aıta kelip, Qazaqstan da bul sektordy damytý úshin Astana qarjy ortalyǵy men Astana habtyń jumysyn bastaǵanyn aıtty. Nátıjesinde, qazirdiń ózinde jańadan ondaǵan myń jańa jumys orny ashylýda.
Kásipkerlermen kezdese otyryp, Úkimet basshysy bıýdjetten shaǵyn nesıeleýge berilgen qarajattyń ıgerilmeı jatqanyn da nazardan tys qaldyrmady. «Atalǵan baǵdarlama boıynsha bólingen qarajat suranysqa ıe emes. Keı jerlerde jaqsy jolǵa qoıylǵanymen, keı qalalar tipti ıgermeı jatyr», degen B.Saǵyntaev shaǵyn nesıe ıgerilmeı jatqan óńirlerdiń biri retinde Túrkistan oblysyn atady. Qarajattyń ıgerilmeı qalýyna birinshi kezekte jergilikti ákimdikter aıypty desek, keı máselelerde atqarýshy bıliktiń bergen múmkindigin kásipkerlerdiń de paıdalanbaı otyrǵan kezderi bar eken. Máselen, Úkimet basshysy arnaıy ekonomıkalyq aımaqtardaǵy (AEA) jeńildikterdi kásipkerlerdiń óz ıgilikterine jaratpaı otyrǵanyn synady. «Arnaıy ekonomıkalyq aımaqtar men ındýstrııalyq aımaqtardyń bar ekenin aıttyq. Biraq statıstıka boıynsha bul aımaqtar durys tolmaı jatyr. Barlyq ınfraqurylym men jaǵdaı jasalǵan, biraq kásipkerlerdiń qyzyǵýshylyqtary joq», degen Úkimet basshysy máseleniń sebebin anyqtaý keregin aıta kelip, «Atameken» UKP-nyń osy týraly tereń saraptama jasar jóni bar ekenin aıtty.
Kásipkerler palatasynyń habarlaýynsha, palata bastamasymen sońǵy jyldar ishinde bıznes-ortany jetildirý maqsatynda ruqsat berý sany 72 paıyzǵa, talaptar sany 58 paıyzǵa azaıtylyp, nátıjesinde bıznestiń bir jolǵy shyǵyndary 600 mlrd teńgege tómendetilip, bıznes jyl saıyn 5,5 mlrd teńge únemdeıtin boldy. Al zańnamany izgilendirý maqsatyndaǵy bastamalar nátıjesinde 2016 jyly respýblıka boıynsha 320 myń kásipker jaýapkershilikke tartylsa, 2018 jyly bul kórsetkish ázirge 200 myńnyń aınalasynda bolyp otyr.
Keler jylǵa jospar retinde kásipkerler palatasy jeti óńirlik negizgi bastamany maqsat etip otyr. Atap aıtar bolsaq, aqparatqa onlaın qoljetimdilikti qamtamasyz etý; tolyq formatty kásipkerlerge qyzmet kórsetý ortalyqtaryn qurý men damytý; shaǵyn ındýstrııalyq aımaqtardy qurý men damytý; saýda jasaýǵa bos alańdar bólý; keńes berý-aqyldasý organdarynyń tıimdi qyzmetin qamtamasyz etý; memlekettik satyp alýlarda jergilikti qamtýdy arttyrý jáne óńirlik damý ınstıtýttarynyń rólin kúsheıtý.
Baýyrjan MUQAN,
«Egemen Qazaqstan»