Aqtóbede alǵashqy qysqy qaıyrymdylyq baly ótti. Oǵan mesenattyq salaǵa erekshe nazar aýdaratyn memlekettik qyzmetkerler, kásipkerler, ardagerler, jastar, qoǵamdyq birlestikter men qorlardyń ókilderi, barlyǵy 200-den asa adam qatysty.
Balǵa kirý úshin tólenetin qaıyrymdylyq jarna quny 10 myń teńge, ıaǵnı uıymdastyrýshylar tek kirý bıletteriniń ózinen muqtaj jandar úshin 2 mln teńgeden astam qarajat jınady. Budan basqa, qoǵamdyq qaıyrymdylyq qory aýksıonnan túsken 3 mln teńge men arnaıy ornatylǵan jáshikterde jınalǵan qarajatty berdi.
«Prezıdent joldaýy, «Rýhanı jańǵyrý» baǵdarlamasy men basqa da memlekettik baǵdarlamalar aıasynda bıyl «Baqytty bala», «Týǵan jerge taǵzym», «Mektepke jol», «Túlek.kz», «Aýyl qamqorshysy» jáne t.b. syndy kóptegen qaıyrymdylyq jobalar júzege asyryldy. Osy zalǵa jınalǵandar bul jobalardy birinshi bolyp qoldady. Nátıjesinde oblystyń 508 myńnan asa turǵynyna 6,5 mlrd teńgedeı kómek kórsetildi. Týǵan ólkesiniń tynysyna at salysyp, yqylas bildirgen árqaısysyńyzǵa alǵys aıtqym keledi»,- dedi Berdibek Saparbaev alǵashqy qysqy qaıyrymdylyq balynyń qatysýshylaryna.
О́ńir basshysy qaıyrymdylyq isine erekshe kóńil bólip, áleýmettik mańyzy zor máselelerdi sheshýge jáne aqtóbelikterdiń túıitkildi máselelerine beı-jaı qaramaıtyn oblystyń úzdik mesenattaryn marapattady. Atap aıtqanda, oblys ákimi «Real Gaz Enerdjı» JShS-niń qarjy dırektory, qalalyq máslıhat depýtaty Altynaı Muhanovaǵa, «Stroıdetal» JShS bas dırektory Anatolıı Sımonovqa, «Darý» ońaltý ortalyǵynyń quryltaıshysy, oblystyq máslıhat depýtaty Ǵalymjan Eleýov pen «Global Spesodejda» JShS dırektory Nadejda Shabaevaǵa «Jomart júrek» medaldaryn tabys etti.
Budan ózge, Aqtóbe men oblystyń barlyq aýdandarynyń qıyndyqqa tap bolǵan, sonymen qatar ótip bara jatqan jyly oqýda, sportta jáne ónerde kózge túsken jıyrma stýdentine noýtbýkter berildi.
Aıta keteıik, birinshi qysqy bal saltanatty túrde, degenmen qarapaıym ótti: uıymdastyrýshylar meıramhananyń ornyna jekpe-jek saraıynyń sport zalyn, al mol dastarhannyń ornyna jemis-jıdekter men salqyn sýsyndar qoıylǵan jeńil fýrshetti qup kórdi.
Temir QUSAIYN,
«Egemen Qazaqstan»