Taılandta qatty daýyl bolýy múmkin

Tabıǵattyń tosyn jaǵdaıy týraly Taıland tehnologııalar jáne ǵylym mınıstrligi Gıd­rologııalyq jáne aýylsha­rýa­shylyq aqparattar ınstıtýty óziniń www.tmd.go.th resmı saıtynda habar taratqan. Ins­tıtýt mamandarynyń máli­metinshe, 1962 jyldan beri bol­maǵan tropıkalyq qatty daýyl Taıland ońtústiginiń basym bóligi, Samýı men Phýket araldary jáne Phangnga men Krabı provınsııalaryndaǵy týrıstik aımaqtarǵa jaqyndap keledi. Dálirek aıtqanda, Taı­land­tyń ońtústigindegi Sıam shy­ǵanaǵynan Andamand teńizine deıin, Samýı, Phýket, Krabı jáne Phangngada jyldamdyǵy saǵatyna 65 shaqyrymǵa jete­tin qatty daýyl turady. 

«Reliefweb» portalynda jarııalanǵan ınstıtýt ókilderiniń málimetinshe 1962 jyly bolǵan tropıkalyq qatty quıyn kezinde 12 provınsııa qırap, 900-den astam adam qaıtys bolǵan. Al aldaǵy daýyl saldarynan teńiz tolqyndary 5 metrden asyp kóterilýi múmkin, sondyqtan barlyq tabıǵı apattardyń saldaryn joıý jónindegi agenttikterge daıyn bolý eskertildi. О́ıtkeni daýyl Taıland pen Mıanmadaǵy 5,3 mıllıonǵa jýyq adam mekendep jatqan aýmaqty qamtıdy dep kútilýde.  

The New York Times Taı­land meteorologııalyq basqar­masynyń barlyq sý kólikterine senbige deıin jaǵada qalýdy eskertkenin jazǵan.  

SIM Taılandtaǵy jergilikti bılik ókilderine silteme jasaı kele, «Pabýk» tropıkalyq daýy­lynyń 5 qańtarda Sıam shyǵanaǵynan Taıland jaǵa­laýlaryna jetýi múmkin ekenin aıtady. Al atalǵan bılik ókil­deri jetkizgen boljam boıynsha, 4 qańtarda Sýratthanı, Nak­hon­sıthammarat, Phat­thalýng, Songkhla, Pattanı, Iаla, Narathıvat, Krabı, Trang jáne Satýn provınsııa­larynda, 4-5 qańtarda Phet­býrı, Prachýapkhırıkhan, Nak­hon­sıthammarat, Phatthalýng, Songkhla, Pattanı, Iаla, Narat­hıvat, Ranong, Phangnga, Phý­ket, Krabı, Trang jáne Satýn provınsııalarynda qatty ja­ýyn jaýmaq. 

Syrtqy ister mınıstrligi Qazaqstan azamattaryna tótenshe jaǵdaı bolǵanda mı­nıs­tr­lik saıtynda kórsetil­gen málimetter arqyly Taıland­taǵy Qazaqstan elshiligine habarlasýdy eskertedi. 

Aıdana ShOTBAIQYZY,

«Egemen Qazaqstan»