Almatyda A.Seleznev atyndaǵy horeografııalyq ýchılıshede «О́rleý» jas artıster teatrynda Nobel syılyǵynyń laýreaty Nelson Mandelanyń týǵanyna 100 jyl tolýyna oraı saltanatty kesh ótti.
Saltanatty sharaǵa QR Syrtqy ister mınıstriniń orynbasary Ashat Syzdyqov, Ońtústik Afrıkanyń Qazaqstandaǵy Elshisi Kııtýmetsı Sııpılo Tandeka Mettıýs, Abaı atyndaǵy Opera jáne balet teatrynyń dırektory Aıa Qalıeva, Evrazııalyq mádenıet qorynyń vıse-prezıdenti Shyńǵys Qanapııanov, P.Chaıkovskıı atyndaǵy Almaty mýzyka kolledjiniń dırektory Birjan Hasanǵalıev, J. Elebekov atyndaǵy estrada sırk kolledjiniń dırektory Dáýlet Dosbatyrov, Qazaqstan 8 OAR qorynyń dırektory Danııar Sharip, Qazaqstanda turatyn ári jumys isteıtin OAR ókilderi, balet ardagerleri qatysty.
Salanatty shara barysynda ǵylym magıstri, tarıh pániniń oqytýshysy A.Raıymqulova Nelson Mandelanyń qoǵamdyq-saıası ómirine qatysty baıandama jasasa, Ońtústik Afrıkanyń Qazaqstandaǵy Elshisi Kııtýmetsı Sııpılo Tandeka Mettıýs quttyqtaý sóz sóıledi. Odan keıin QR Syrtqy ister mınıstriniń orynbasary Ashat Syzdyqov eki el arsyndaǵy ekonomıkalyq-saıası jáne memlekettik baılanystar týraly aıtyp ótse, keleside Nelson Mandelanyń ómiri men qyzmetine qatysty foto jáne derektifılm kórsetildi. Sondaı-aq dırektordyń oqý-ádisteme birlestigi boıynsha orynbasary Gúlzara Qanapııanova Elshi Kııtýmetsı Sııpılo Tandeka Mettıýske 1993 jyly túsirilgen tarıhı sýretti tabys etti.
Elvıra SERIKQYZY,
«Egemen Qazaqstan»
ALMATY