Jańa bastaǵan jylda da qyzylordalyq baıyrǵy fototilshi Bolat Omarálıevpen shyǵarmashylyq baılanysymyz baıandy bolsyn deı otyryp, selt etkizer sátter, sırek sýretterdi sóılete bermekpiz.
Sonymen jarty ǵasyr boıy fotoapparatyn qolynan tastamaǵan jannyń ózi úshin de qundy sanalatyn sýretteriniń biri Mustafa Shoqaıdyń aýylyna barǵanda túsirilgen – «bıshi» aǵash bolsa, biz osy aıdarymyzdyń alǵashqy betterin sol «О́rtengen aǵash» fotosymen ashqanymyz este. Bolat Omarálıev óziniń janyna eń jaqyn sýretterdi 1975-1985 jyldary túsirgen bolsa, sonyń ishinde eki jyl ýaqytyn jegen «Soǵys jesirleri» degen serııasy da shırek ǵasyrdan asqanda burnaǵy jyly «Egemen Qazaqstan» oqyrmandarymen qaıta qaýyshty.
– Ol kezde soǵys jesirleriniń kóbi tiri edi. Olardyń kól bolǵan kóz jasyn kórgende men de fotokameramdy qushaqtap, eriksiz jylap jibergenmin. Men úshin «Soǵys jesirleri» erekshe ystyq, – deıdi fototilshi.
Sonymen búgingi sýret tómendegideı syr shertedi.
– 1982 jyldary issaparmen jolǵa shyǵyp, qart Qarataýdyń etegin jaılaǵan bir jylqyshynyń úıinde sýsyn iship otyrsam, ashyq turǵan kıiz úıdiń esiginen alysta bir attyń jalyna jabysyp, mine almaı jatqan bala kózime tústi. Bar bolǵany tórt jastaǵy jylqyshynyń balasy qaıtpaı atqa minýge áreket jasap jatyr. Men de sómkemnen jalma-jan fotokameramdy alyp, balaǵa qaraı júgirdim. Jetemin degenimshe attyń aldyńǵy aıaǵyna óz aıaǵyn salyp, jalyna jabysqan kúıde turǵan bala jerge qulap tústi. Aıaǵyn jyryp alǵan syńaıly. Jylamsyrap otyrǵan jerinde sýretke túsirip úlgirdim. Biraq ol meniń sýretke túsirgenimdi unatpaı, qaıqańdap orynnan atyp turyp jylap ala jóneldi.
Eger bul bala ómirli bolsa, qazir qyryqtyń qyrqasyna qulash urǵan, asaýǵa bas bildiretin naǵyz er azamat bolǵan shyǵar?! – deıdi Bolat Omarálıev.
Aınash ESALI,
«Egemen Qazaqstan»
ALMATY