Taǵdyrynan teperishti kóp kórip, jany júdegen adamǵa jaqsylyq jasaǵan qandaı ǵajap! Úmit oty laýlaıdy, senimi nyǵaıady. Al jaqsy is, janashyr lepes, qamqor kóńil kópke úlgi.
Kókshetaýlyq Almagúl Erkinbekovanyń basynan keshkenin tarqatyp aıtsańyz, ımanyń qasym bolǵandaı. Joldasy avtokólik apatynan qaıtpas saparǵa attanyp, shıetteı alty balamen ańyrap jesir qalǵan jalǵyzilikti áıel taǵdyrdyń taqsyretti synyn kóp kórdi. Áıtse de synǵan joq, synýǵa haqysy da joq edi. Alty balany qatarynan kem qylmaı jetkizý kerek. Biraq sol salmaq jalǵyz áıelge ońaı ma?! Basynda baspanasy da joq. Bireýdiń aýlasyndaǵy qurqyltaıdyń uıasyndaı, at aınalǵysyz kishkentaı úıin jalǵa alǵan. Taǵdyr bir qyryna alsa bolmaıdy eken ǵoı. Bir kúni ómir oty kúıdirgeni azdaı, álgi baspananyń jalyn qushaǵynda qalǵany. Áıteýir, úlken qyzy qyzyl tili sýmańdap, qyp-qyzyl qasiret ákele jatqan órt qushaǵynan eki baýyryn aman-esen alyp shyǵypty. О́zi jumysta bolatyn. Keıin estigende kúıikten júregi jarylyp kete jazdady.
Tabysy da shamaly. Arzan páter izdep qalanyń bir qıyrynan ekinshi qıyryna deıin súzip shyǵady. Nesin aıtasyz, baspananyń zary ábden ótip turǵan. Biraq táńirdiń ózi kóp jylatqan pendesin túbinde bir qýantady eken ǵoı. Máýlit meıramyna jınalǵan qaraqurym halyqtyń aldynda Qazaqstan musylmandary dinı basqarmasynyń Aqmola oblysy boıynsha ókili, Naýan haziret meshitiniń bas ımamy Qýanysh Sábıttiń qolynan eki bólmeli páterdiń kiltin alǵanda tóbesi kókke bir-aq eli jetpeı qalǵan.
Júzi balbul janyp alaburtqan, mynaý jaryq dúnıede jany izgi jaqsy adamdardyń bar ekendigine qýanǵan Almagúldiń basyndaǵy shattyqty sıpattaý sirá, múmkin emes. Aq túıeniń qarny jarylǵan degen osy bolar.
Endi dúıim jurt kýá bolǵan, áseri mol, ádemi isti túpten tartyp sabaqtap kórelik. «Zeket» qory 2012 jyly óz jumysyn bastaǵan. Alǵashqy bette kópshiliktiń sadaqaǵa bergen qarajatymen muqtaj adamdarǵa kómek kórsetýdi murat tutqan qordyń jumysy ýaqyt óte kele aýqymyn keńeıtti. Muqtajdarǵa ǵana emes, ózge de izgi nıetti iske jumsaı bastady. Máselen, «Mektepke jol» tárizdi aksııalar. Bıyl myńǵa jýyq balaǵa oqýshy sómkesimen qosa, qajetti oqý quraldaryn satyp áperdi. Qurban aıtynda 25 tonnadan astam etti áleýmettik jaǵynan az qamtylǵan otbasylaryna taratty. Jalǵyz bul ǵana emes, kúndelikti qajetti otyn-kómir, un, kartop tárizdi azyq-túlik satyp áperýdi de dástúrge aınaldyrdy.
– Naýan haziret meshitiniń bas ımamy Qýanysh Sábıttiń bastamasymen «El úlesi – páterge» jobasy qolǵa alynǵan bolatyn, – deıdi «Zeket» qorynyń jaýapty ókili Erbolat Shárip, – eń aldymen kópbalaly otbasylaryna el bolyp qarajat jınap, úı satyp áperýdi mejelep otyrmyz.
Aldymen aǵaıyn qulaqtanǵan. Juma namazyna jınalǵan jurtshylyqqa jańa jobanyń izgilikti qyr-syry jetkizilgen. Arnaıy taqta daıyndalyp, móldir tústi plastıkten jáshik jasalyp, kópshiliktiń qarajaty soǵan salynatyn bolǵan. Baspana satyp alýǵa tolaıym jetetin qarajat az ýaqyttyń ishinde jınalypty. Bul zaıyry adamdardyń izetti kóńiliniń qandaı ekendigin uqtyrsa kerek.
Oblys ortalyǵynda baspananyń baǵasy kúıip tur. Al buryn aýdan ortalyǵy bolǵan, qazirgi kúni oblys ortalyǵyna qaraıtyn Krasnoıar aýyly kimge bolsyn qolaıly-aq. Kólik qatynasynda min joq. Osy aýyldaǵy Oktıabrdiń 50 jyldyǵy kóshesindegi eki qabatty úıler jańa jobanyń jolyn ashqandaı. Qabyrǵasy bútin, shatyry saý úılerdiń ishki árleý jumystaryn ǵana júrgizý kerek. Al baǵasy arzan. Osy úıden páter alyp, sońǵy úlgimen jóndeý jumystaryn jasap, jańa jıhaz satyp alǵan soń qulazyp turǵan baspana qyzdyń jıǵan júgindeı jutynyp shyǵa keldi. Endigi másele úmitkerlerdi ókpeletpeı, ádil sheshimin tabý. Ádildigimen aty shyqqan el aqsaqaldarynan tóralqa quryldy. Máseleni solar sheshpek. Bir páter Mońǵolııadan týǵan topyraǵyna oralǵan jeti balanyń anasy, jesir áıel Máýlengúl Tarbahqa berilsin dep sheshti aqsaqaldar. Jaıdan-jaı aıta salǵan joq, baılam jasardyń aldynda jeti balaly jesir ananyń turmysyn kózderimen kórip keldi. Jataqhananyń jalǵyz bólmesinde turatyn kópbalaly ananyń jaǵdaıy shynynda da adam aıaıtyndaı edi. Jaqsylyqtan úmit úzbegen Máýlengúl Tarbah Ramazan aıynyń alǵashqy kúni ótkizilgen shara barysynda eki bólmeli páterdiń kiltin aıalaı qysyp, aıyrylyp qalardaı alaqanyn tars jumyp ustaǵan sátte janarynan jas saýlap turǵan. Kóp balaly ananyń aq júreginen aqtarylǵan alǵysy merekege jınalǵan jalpaq jurtty tebirentip jiberdi.
– Jaqsylyq jasaýǵa qumarlar kóp, – deıdi qordyń jaýapty ókili Erbolat Shárip, – eki-úsh myń teńge jáshikke salý qıyn emes qoı. Ony aıtasyz, el qulaqtanǵan soń júz myńdap bergen azamattar bar.
Qazaq ejelden jomart halyq. Astyndaǵy jalǵyz atyn jolaýshyǵa túsip bergen «atymtaılardyń» búgingi jalǵasy da bar eken. Soǵan qýandyq. Rýhanı jańǵyrǵan, ótkeninen óshpes úlgi alǵan jasampaz jaqsylyqtyń jalǵasy osy emes pe?!
Baıqal BAIÁDIL,
«Egemen Qazaqstan»
Aqmola oblysy