Kım Chen Ynnyń bıylǵy jańa jyldyq quttyqtaýy Ońtústik Koreıa, Shyǵys Azııa men Amerıka elderinde erekshe nazarǵa ilikti. Onyń nazarǵa iligýiniń sebebi baı mazmuny, halyqaralyq saıasatqa toqtalýy men quttyqtaý formasynyń ózgerýi bolyp otyr. Sarapshylardyń aıtýyna qaraǵanda, bıylǵy quttyqtaý formasynan burynǵy jyldarǵa qaraǵanda jańashyldyq baıqalady. Ásirese amerıkalyq jáne batystyq stıldegi quttyqtaýǵa jaqyn. Bul onyń memleket saıasaty jáne qoǵamdaǵy ishki ómirdiń qalypty jaǵdaıda ekenin kórsetýi syndy. Batystyń kózqarasymen aıtqanda, «demokratııalyq normaǵa saı qalypty memleket» degen oı qaldyrý úshin jasalǵan dep qarastyrylýda.
Ol atasy Kım Ir Sen men ákesi Kım Chen Irdiń sýreti ilingen jeke kabınetinde dıvanǵa otyryp, burynǵy stıldegi kıim úlgisin tastap, Batystyń stılinde galýstýk pen kostıým kıip, jańa jyldyq quttyqtaýyn otyz mınýt boıy kidirmeı aıtyp shyqty. Ádette turyp sóıleıtin Kım myrza bul joly, dıvanǵa otyryp, emin-erkin quttyqtaý joldady. Onyń bul jolǵy quttyqtaý sózinen eń mańyzdy baǵyttar baıqaldy. Birinshi, eldiń ekonomıkalyq ál-aýqatyna basymdyq berdi. Ekinshi, halyqaralyq qarym-qatynas boıynsha AQSh jáne Ońtústik Koreıamen ótkizgen kelissózderge toqtaldy. Úshinshi, ıadrolyq qarýsyzdaný týraly baǵyt-baǵdarǵa qatysty, Soltústik tarapynyń ıadrolyq qarýsyzdanýǵa degen ózgermes nıeti men ustanymdaryn málimdedi. Basa nazar aýdaratyn nárse, eger AQSh sekildi el óz ýádesinde tursa qarýsyzdanatyndyǵy, eger ýádesinde turmaı, túrli syltaý taýyp, baıaǵysha halyqaralyq qaýymdastyqtyń kómegimen qysymdy údetetin bolsa, basqa shyǵar joldy qarastyratynyn qadap aıtty. Sonymen qatar qos Koreıanyń birjyldyq qarym-qatynasyna qatysty baǵa berdi. 2018 jyldy 70 jyldyń ishinde úlken ózgeriske bet burǵan jyl dep, eki eldiń arasynda bolǵan kezdesý nátıjesine qanaǵattanatynyn jetkizdi. Koreı túbegin beıbitshilik túbegine aınaldyrý, Keson zaýyty men Kymgansan týrıstik zonasyn Ońtústik tarapta ıgerýge baılanysty usynys-oıyn ortaǵa saldy. Áskerı sala boıynsha Koreı túbegin beıbitshilik alańy jasaý úshin eki eldiń arasyndaǵy áskerı teketiresti jumsartýǵa degen nıetinde ózgeristiń bolmaıtynyna toqtaldy. Áskerı teketiresti boldyrmaý maqsatynda Amerıka men Ońtústik Koreıanyń áskerı jattyǵýlaryn ótkizbeýdi jáne syrtqy staregııalyq kúshterdi túbekke ákelmeý jáne engizbeýge asa mán berip sóıledi. Túbektiń beıbitshiligi úshin, onyń jaǵdaıyna qatysty eldermen de kópjaqty kelissózderdi ótkizetindigin bildirdi.
Kım Chen Yn jańa jyldyq quttyqtaýda «AQSh prezıdenti Donald Tramppen kez kelgen ýaqytta betpe-bet otyryp sóılesýge daıynbyz» dedi. Sonymen qatar quttyqtaý sózinde «Tolyq ıadrolyq qarýsyzdaný» týraly birinshi ret Kım Chen Yn jalpy jurtqa jarııalady. «Tolyq ıadrolyq qarýsyzdanýǵa ótý degenimiz bizdiń partııamyz ben respýblıkalyq úkimetimizdiń ózgermeıtin pozısııasy jáne meniń ózgermeıtin erik-jigerim men nıetim» dep atap ótti. Alaıda osyndaı tolyq ıadrolyq qarýsyzdanýǵa degen nıetiniń barlyǵyn baıqatqan Kım Chen Ynnyń Amerıka óz ýádesinde turmaı, bergen ýádelerin oryndamaıtyn bolsa, basqa jol tabamyz degen sózi áli de barlyq másele AQSh-qa tirelip turǵanyn ańǵartady. Soltústik Koreıa úshin AQSh sekildi eldiń ýádesinde naqty turýy mańyzdy. AQSh ýádesinde tursa ǵana Kım Chen Yn da ıadrolyq qarýsyzdanýǵa daıyn ekeni ańǵaryldy. Sondyqtan osy jyly AQSh pen Soltústik Koreıanyń arasynda josparlanǵan kelesi sammıt pen Kım Chen Ynnyń Seýlge qarymta sapary koreı máselesin sheshýge birshama yqpal etý kerek. Sonda ǵana AQSh pen Soltústik Koreıanyń kezdesýleri men kelissózderinen álem naqty nátıjelerdi kóre alady.
Dastan AQASh, arnaıy «Egemen Qazaqstan» úshin
Ońtústik Koreıa,
Seýl qalasy