Raıymbek aýdanynyń qart turǵyny Bátı apany syrttaı surastyryp taptyq. Qarııany biletin jurttyń barlyǵy biraýyzdan «Muqaǵalıdyń óleńderin jatqa aıtatyn apa ǵoı...» dep jón siltegen edi.
– Bátı apa bıyl júzdiń úsheýin jasap otyr. Shıraq, sanasy tyń. Bala kúninde estigen áńgimeleriniń maıyn tamyzyp aıtqanda, qarııa jadynyń myqtylyǵyna tańǵalasyń, – dedi jol ústinde oblystyq «Jetisý» gazetiniń menshikti tilshisi Qanat Birjansal.
...Qaıran bizdiń shesheler, ardy oılaǵan,
Shilik shaýyp, shı oryp, baý baılaǵan.
Jigitterden aıyrylyp, qalmaı qarań,
Qyrman basyp, egin sap, arba aıdaǵan...
Bátı apa ózi jatqa aıtatyn Muqaǵalı aqynnyń osy óleńiniń keıipkeri sııaqty. Sonaý soǵys jyldarynda eldegi aýyr eńbektiń salmaǵyn ıyǵymen kótergen 103 jastaǵy qarııa qazirgi tirshilikke salaýat aıtady.
– Zulmatty kózimizben kórdik qoı, endi elimizdiń basyna ondaı kún bermesin, – deıdi apa. Sóziniń astarynan kári júrekke soǵystyń syzy ǵana emes, onyń aldyndaǵy qýǵyn-súrginniń soıyly batqany ańǵarylady. О́ıtkeni Bátı apanyń qudaı qosqan qosaǵy Ekinshi dúnıejúzilik soǵystyń aldynda «halyq jaýy» degen jalamen ustalyp ketipti. Aqmola mańyndaǵy tutqyndar lagerine aıdalǵan eken. Sol jaqta qaıtys bolǵany jaıly tildeı qaǵaz kelgen. Keıin, 1956 jyly ǵana aqtalypty. Erinen qalǵan 4 uldy qanattyǵa qaqtyrmaı, tumsyqtyǵa shoqyttyrmaı ósirgen Bátı apa qazir uly Moldyramannyń qolynda. «Anasy bar adamdar, eshqashan qartaımaıdy» degendeı, Moldyraman aqsaqaldyń ózi jetpis bes jasty alqymdady. Qarııanyń batasyn alyp turyp ǵasyr jasaǵan «Egemen Qazaqstan» gazetinen ekenimizdi aıttyq.
– E, biz «kázıt-jornal» oqyp óstik qoı, qazir de shóberelerime oqytyp alamyn. Soǵys ýaqytynda brıgadır gazetti qyrman basyna ákelip, daýystap oqyp beretin. Bizdiń áskerdiń jeńisi jaıly oqyp, jylap alatynbyz. Jaqsy habardy kóp jazyńdar, aınalaıyndar, – dedi 103 jastaǵy Bátı apa.
Qalmahanbet MUQAMETQALI,
«Egemen Qazaqstan»
Almaty oblysy